မန္တလေးငလျင်ကြီးဒဏ်သင့် စစ်ကိုင်းတိုင်း၊ စစ်ကိုင်းမြို့ရှိ သံဃာ၊ သီလရှင်များနှင့် လူပုဂ္ဂိုလ်များကို IBEC သဘာဝဘေးအန္တရာယ်ကူညီစောင့်ရှောက်ရေးစင်တာနှင့် ပြည်တွင်း/ပြည်ပ နိုင်ငံတကာအဖွဲ့အစည်းများပူပေါင်း၍ ယနေ့ ဧပြီ ၂၉ ရက်က ဝတ္ထုငွေ/အလှူငွေနှင့် ဆေးဝါးများလှူဒါန်းခဲ့ကြောင်း သိရသည်။
စစ်ကိုင်းမြို့ရှိ ပင့်သံဃာတော်အပါး(၇၀)အား တစ်ပါးလျှင် (၁)သိန်းကျပ်စီ၊ သီလရှင်ဆရာကြီး/ဆရာလေးအပါး(၁၀၀၀)ကျော်အား တစ်ပါးလျှင် (၂)သောင်းကျပ်စီ၊ ခေါင်းရိတ်ဓား၊ ဆပ်ပြာ၊ ဆေးဝါးအသုံးအဆောင်များကို ဗီယက်နမ်သံဃာ့အဖွဲ့အစည်းက လှူဒါန်းခဲ့ကြကြောင်း သိရသည်။
ထို့ပြင် လူပုဂ္ဂိုလ်(၁၀၀၀)ဦးအား တစ်ဦးလျှင် (၁၅၀၀၀)ကျပ်စီကိုလည်း လှူဒါန်းခဲ့ကြပြီး လှူဒါန်းမှုအစုစုအတွက် ငလျင်ဘေးကြောင့် အသက်ဆုံးရှုံးသွားသော ရဟန်း၊ ရှင်၊ လူအပေါင်းတို့အားရည်စူး၍ ရေစက်ချအမျှပေးဝေခဲ့ကြကြောင်း သိရသည်။
” အခု အလှူရှင်တွေက ဗီယက်နမ်သံဃာ့အဖွဲ့အ စည်းကနေလာလှူတာပါ။ သူတို့က သီတဂူဆရာတော်ဘုရားကြီး၏ ဩဝါဒကိုခံယူပြီးတော့ ဘုန်းကြီးကျောင်းတွေ၊ သီလရှင်ကျောင်းတွေကို လိုက်လှူပေးနေပါတယ်။ စစ်ကိုင်းမြို့မှာငလျင်လှုပ်ပြီးတော့ သီတဂူဆရာတော်ကြီးက ဘုရား၊ ပုထိုး၊ စေတီတွေ ပြုပြင်ဖို့စီမံတယ်။ ဓမ္မဒူတဆရာတော် ဒေါက်တာအရှင်ဆေကိန္ဒက သီတဂူဆရာတော်ကြီးတို့၊ ဌာနဆိုင်ရာ အကြီးအကဲတွေတို့၊ ပြည်တွင်းသူဌေးအလှူရှင်တွေနဲ့ ပေါင်းစပ်၊ ချိတ်ဆက်ပြီး ရှင်းလင်းရေး၊ ထောက်ပံ့လှူဒါန်းရေးတွေလုပ်တယ်”ဟု IBEC ဆရာတော်က မိန့်ကြားခဲ့သည်။
ထို့ပြင် IBEC မှ UN အပါအဝင် နိုင်ငံတကာအဖွဲ့အစည်းများနှင့်ချိတ်ဆက်၍ အောက်ခြေအခြေခံလူထုအတွက် စားနပ်ရိက္ခာနှင့် ငွေကြေးထောက်ပံ့ လှူဒါန်းပေးလျက်ရှိကာ ရဟန်းသံဃာသည် သီလ၊ သမာဓိ၊ ပညာပေါ် မူတည်၍ ပစ္စည်းလေးပါးအတွက် ဒကာ၊ဒကာမအပေါ် မှီတည်ရသဖြင့် ဒကာ၊ ဒကာမများမရှင်သန်နိုင်ဘဲ သာသနာတော်ရှင်သန်မရ၍ ဒကာ၊ ဒကာမများလိုအပ်ချိန်၌ ၎င်းတို့၏ ရှင်သန်ရေးကို ဆောင်ရွက်ပေးရန်လိုအပ်သည်ဟုလည်း IBEC ဆရာတော်က ကြွရောက်တော်မူလာကြသည့် ဆရာတော်၊ သံဃာတော်၊ သီလရှင်များအား လျှောက်ထားခဲ့သည်။