ကချင်ပြည်နယ်၊ ချင်းပြည်နယ်နှင့် စစ်ကိုင်းတိုင်းဒေသကြီး ရွှေကျင်နိကာယ (ရွှေကျင်ဂိုဏ်းဆိုင်ရာ) သံဃာ့အဖွဲ့အစည်းအဆင့်ဆင့် ထပ်မံရွေးချယ်တင်မြှောက်သည့် စစ်ကိုင်းတိုင်းဒေသကြီးသံဃာ့နာယကအဖွဲ့ကို ၁၃၈၆ ခုနှစ် ၊ပြာသိုလ်လဆန်း (၁၂) ရက် ၊ ဇန်နဝါရီလ (၁၀)ရက် နေ့လယ်(၁၂)နာရီက စစ်ကိုင်းမြို့ မဟာသုဗောဓာရုံကျောင်းတိုက်တွင် ကျင်းပခဲ့သည်။
ရွှေကျင်နိကာယ (ရွှေကျင်ဂိုဏ်းဆိုင်ရာ) သံဃာ့အဖွဲ့အစည်း အဆင့်ဆင့်ပြန်လည်ရွှေချယ်တင်မြှောက် ရွေးကောက်ပွဲဖွဲ့စည်းပုံများ အတည်ပြုရန်အတွက်နိုင်ငံတော် သံဃာ့မဟာနာယက မတ္တရာ ဆရာတော်ကြီးနှင့် တာဝန်ရှိ ကြီးကြပ်ရေးနာယက ဆရာတော်များ အစုံအညီကြွရောက်တော်မူကြကြောင်း သိရသည်။
ကချင်ပြည်နယ်နှင့် စစ်ကိုင်းတိုင်းဒေသကြီးအောက်ပိုင်း (၆) မြို့နယ် အတွက် ဖွဲ့စည်းပုံများကို စစ်ကိုင်းမြို့ ၊ဇိနောဒယ စာသင်တိုက် ဆရာတော်ဘဒ္ဒန္တ ကာရုဏိက က ဖတ်ကြားသင်သွင်းလျှောက်ထားတော်မူသည်။
ထို့နောက်ချင်းပြည်နယ်နှင့် စစ်ကိုင်တိုင်းဒေသကြီးအထက်ပိုင်း (၁၅) မြို့နယ်၏ ဖွဲ့စည်းပုံများကို မုံရွာမြို့၊အလယ်ရပ်၊ရွှေကျင်ဓမ္မာရုံတိုက်မှ ဘဒ္ဒန္တ ဉာနဂ္ဂ ကဖတ်ကြားတင်သွင်းလျှောက်ထားတော်မူသည်။
ဆက်လက်၍ တိုင်းသံဃနာယက အဖွဲ့ ဖွဲ့စည်းကြရာ တိုင်းဝန်ဆောင်ဆရာတော်များ အဆိုပြုကြသည်ကို ကြီးကြပ်ရေး နာယကဆရာတော်များက အတည်ပြု လက်မှတ်ရေး ထိုးတော်မူကြကြောင်း သိရသည်။
စစ်ကိုင်းတိုင်းဒေသကြီး၏ တိုင်းဒေသကြီးသံဃာ့နာယကအဖွဲ့တွင် ဥက္ကဌအဖြစ် စစ်ကိုင်းမြို့၊ဇိနောဒယစာသင်တိုက်မှ ဘဒ္ဒန္တကာရုဏိက၊ ဒုတိယဥက္ကဋ္ဌအဖြစ် မုံရွာမြို့၊ သဒ္ဒမ္မပဇ္ဇောတာရုံကျောင်းတိုက်မှ ဘဒ္ဒန္တနန္ဒိမာလင်္ကာရ၊ အကျိုးဆောင်အဖြစ် မုံရွာမြို့၊ သဒ္ဒမ္မဇောတကသုဗောဓာရုံကျောင်းတိုက်မှ ဘဒ္ဒန္တစန္ဒာဝရ၊ တွဲဖက်အကျိုးဆောင်အဖြစ် စစ်ကိုင်းမြို့၊ ဟံသာဂီရိကျောင်းတိုက်မှ ဘဒ္ဒန္တခေမိန္ဒာစာရ၊ အ ဖွဲ့ဝင်များအဖြစ် အရာတော်မြို့၊ ရွှေညောင်ပင်ကျောင်းမှ ဘဒ္ဒန္တဂုဏောဒယ၊ ဝက်လက်မြို့၊ ချမ်းသာကြီးကျောင်းမှ ဘဒ္ဒန္တဓမ္မရက္ခိတ၊ မြင်းမူမြို့၊ ပဇ္ဇောတာရုံကျောင်းတိုက်မှ ဘဒ္ဒန္တ ဝါသေဌ၊ စစ်ကိုင်းမြို့၊မင်းလှကျောင်းမှ ဘဒ္ဒန္တဉာဏောဘာသနှင့် ကလေးမြို့၊ စမ်းချောင်းကျောင်းမှ ဘဒ္ဒန္တပညာနန္ဒ တို့ကိုကြီးကြပ်ရေးအဖွဲ့က အတည်ပြုဖွဲ့စည်းခန့်အပ်တော်မူခြင်းဖြစ်ကြောင်း သိရသည်။