စင်ကာပူနိုင်ငံ၏ ပီးပဲလ်အက်ရှင်ပါတီ (ပီအေပီ) သည် စနေနေ့တွင် ၁၄ ကြိမ်ဆက်တိုက် ရွေးကောက်ပွဲအနိုင်ရခဲ့ကာ ၎င်းတို့၏ ဆယ်စုနှစ်ခြောက်ခုကြာ အုပ်ချုပ်မှုကို မယိမ်းမယိုင် ဆက်လက်ထိန်းထားနိုင်ခဲ့ပြီး ကမ္ဘာလုံးဆိုင်ရာ စီးပွားရေးစစ်ပွဲကြောင့် စီးပွားရေးကမောက်ကမ သက်ရောက်မှုများ ရင်ဆိုင်ရမည့် နိုင်ငံ၏ ဝန်ကြီးချုပ်သစ်အတွက် ခိုင်မာသော လုပ်ပိုင်ခွင့် ပေးအပ်လိုက်သည်။
၁၉၆၅ ခုနှစ် စင်ကာပူလွတ်လပ်ရေးမတိုင်ခင်ကတည်းက နိုင်ငံကို အုပ်ချုပ်လာခဲ့သော ပီအေပီ သည် ပါလီမန်အမတ်နေရာ ၉၇ နေရာတွင် ၈၇ နေရာအနိုင်ရခဲ့ပြီး အတိုက်အခံများသည် ယခင်ရွေးကောက်ပွဲများတွင် အောင်မြင်ခဲ့မှုအချို့ကို ထပ်မတိုးချဲ့နိုင်ခဲ့သောကြောင့် မဲဆန္ဒနယ် ၃၃ ခု၏ နေရာများစွာတွင် အပြတ်အသတ်အနိုင်ရခဲ့သည်။
ပီအေပီ သည် အမတ်နေရာ ၉၀ ရာခိုင်နှုန်းခန့်ဖြင့် တစိုက်မတ်မတ်အနိုင်ရခဲ့သော်လည်း ပြီးခဲ့သည့် ရွေးကောက်ပွဲတွင် အဆိုးဝါးဆုံးစွမ်းဆောင်မှု မှတ်တမ်းဝင်ခဲ့ပြီးနောက် ဝန်ကြီးချုပ် လောရင့်ဝေါင်က သူ့လက်ထက် ပထမဆုံးရွေးကောက်ပွဲတွင် အမှတ်အသားတစ်ခု ချန်ထားခဲ့ရန် စိတ်အားထက်သန်ခဲ့သည်။
ပီအေပီ အနိုင်ရမှုကို တရားဝင် မကြေညာသေးသော်လည်း ပြည်တွင်း မီဒီယာများ၏ ဖော်ပြချက်အရ မဲအရေအတွက် ၆၅ ဒဿမ ၅၇ ရာခိုင်နှုန်း ရရှိထားသည်ဟု သိရကာ ၂၀၂၀ ပြည့်နှစ်က ရွေးကောက်ပွဲတွင် ရရှိခဲ့သော ၆၁ ဒဿမ ၂ ရာခိုင်နှုန်းထက် ကျော်လွန်သွားပြီဖြစ်ကြောင်း သိရသည်။
Ref: စီအင်န်အင်န်