ထိုင်းနိုင်ငံ၊ရနောင်းခရိုင်၊ကရဘူရီမြို့နယ်တွင် စက်လှေဖြင့်ဝင်ရောက်လာပြီးနောက် မြန်မာနိုင်ငံသားတစ်ဦးလာကြိုသည့် ပစ်ကပ်ကားပေါ်တက်နေသည့် တရားမဝင် ဝင်ရောက်လာသော မြန်မာနိုင်ငံသား ၈ ဦး ဖေဖော်ဝါရီ ၁၉ ရက်နံနက်ပိုင်းက ဖမ်းဆီးခံခဲ့ရကြောင်း သိရသည်။
ယင်းနေ့နံနက် ၄ နာရီခန့်က ကရဘူရီမြို့နယ်၊မမုကျေးရွာတွင် ကော့သောင်းမြို့ဘက်မှစက်လှေဖြင့်ဝင်ရောက်လာသည့် မြန်မာနိုင်ငံသား အမျိုးသား ၆ ဦးနှင့်အမျိုးသမီး ၂ ဦးတို့အား ကင်းလှည့်နေသည့် ထိုင်းတပ်မတော်မှ ဖမ်းဆီးခဲ့ကြခြင်းဖြစ်သည်။
တရားမဝင်ဝင်ရောက်လာသည့် မြန်မာနိုင်ငံသား ၈ ဦးအပြင် ၎င်းတို့အား ပစ်ကပ်ကားဖြင့်လာကြိုသည့် မြန်မာနိုင်ငံသားတစ်ဦးကိုလည်း ဖမ်းဆီးရမိခဲ့သည်ဟု သိရသည်။
ထိုင်းနိုင်ငံ၊ဖူးကစ်မြို့၌ အလုပ်လုပ်ကိုင်ရန် ဝင်ရောက်လာပြီး ပွဲစားခအဖြစ် တစ်ဦးလျင် ဘတ် ၁၅၀၀၀ ပေးချေခဲ့ရကာ မော်လမြိုင်မြို့မှလာရောက်သူများဖြစ်ကြောင်း စစ်ဆေးသိရှိခဲ့ရသည်။
ထို့ကြောင့် ဖမ်းဆီးရမိသူများအား ထိုင်းနိုင်ငံဥပဒေအရအရေးယူရန် ရနောင်းခရိုင်၊ပါက်ကျန်ရဲစခန်းသို့ပို့ဆောင်ခဲ့ကြကြောင်း သိရသည်။