ငွေစက္ကူအစစ် ၁၇သိန်းပေး၍ ဝယ်ယူခဲ့သော ကျပ်တစ်သောင်းတန် ငွေစက္ကူ အတုများနှင့်အတူ တရားခံသုံးဦးဖမ်းဆီးရမိ

ငွေစက္ကူအစစ် ၁၇သိန်းပေး၍ ဝယ်ယူခဲ့သော ကျပ်တစ်သောင်းတန် ငွေစက္ကူ အတုများနှင့်အတူ တရားခံသုံးဦးဖမ်းဆီးရမိ

ရခိုင်ပြည်နယ် ၊ တောင်ကုတ်မြို့တွင် ငွေစက္ကူအစစ် ၁၇သိန်းကျပ်ပေး၍ ဝယ်ယူခဲ့သော ကျပ်တစ်သောင်းတန်ငွေစက္ကူအတုများနှင့်အတူ တရားခံသုံးဦးကို ယမန်နေ့ ဇူလိုင်၁၂ ရက် ဖမ်းဆီးရမိခဲ့ကြောင်း သိရသည်။

ယမန်နေ့ ဇူလိုင် ၁၂ ရက် နံနက် ၁၀ နာရီအချိန်ခန့်တွင် တောင်ကုတ်မြို့နယ်၊ မီးချောင်းထိုးကျေးရွာအနီး၌ ငွေစက္ကူအတုများလဲလှယ်နေကြောင်း သတင်းအရ တောင်ကုတ်မြို့မရဲစခန်းမှ တပ်ဖွဲ့ဝင်များက စုံစမ်းဖမ်းဆီးခဲ့ရာ သန့်ဇင်ထွန်း (ဘ)ဦးထွန်းထွန်း၊ အသက် (၂၁)နှစ်၊ လိပ်ကုန်းဘောင်ကျေးရွာ၊ တောင်ကုတ်မြို့နယ် နေသူအား ငွေစက္ကူအတုဟုယူဆရသော ခဓ ၈၄၂၇ ၅၉၈/BS 8427598 နံပါတ်စဉ်ပါ တစ်သောင်းကျပ်တန် ၁၀၅ ရွက် (၁,၀၅၀,၀၀၀ ကျပ်)နှင့်အတူ ဖမ်းဆီးရမိခဲ့ခြင်းဖြစ်သည်။

အဆိုပါ ဖမ်းဆီးရမိခဲ့သည့် ငွေစက္ကူအတုများ၌ လေဆာကြိုးအရောင်မှာ ပြောင်းလဲခြင်းမရှိဘဲ သာမန်မိတ္တူကူးစက္ကူအမျိုးအစားဖြစ်ကာ ငွေစက္ကူအစစ်ထက် အလျား ၁ မီလီမီတာ ရှည်ပြီး အနံ ၁ မီလီမီတာ တိုနေကြောင်း စစ်ဆေးတွေ့ရှိခဲ့သည်။

ဖြစ်စဥ်နှင့်ပတ်သက်၍ ကနဦးဖမ်းဆီးရမိသူ သန့်ဇင်ထွန်းအား စစ်ဆေးမေးမြန်းခဲ့ရာ ၎င်းငွေစက္ကူအတုများအား Facebook Messenger မှတစ်ဆင့် ဆက်သွယ်၍ တောင်ကုတ်မြို့နယ်၊ ပဒါကျေးရွာနေ မာမာဝင်း၊ ခင်သီတာလွင်တို့နှင့်အတူ ရန်ကုန်မြို့၊ အောင်မင်္ဂလာအဝေးပြေးကားဝန်းအနီး၌ ငွေစက္ကူအစစ် ၁၇ သိန်း ပေး၍ ငွေစက္ကူအတု ၁၀၀၀၀ ကျပ်တန် ၅၃၀၀၀၀၀ ကျပ် သွားရောက်ဝယ်ယူခဲ့ပြီး ပြန်လာခဲ့ပြီး၊ လမ်းခရီးတစ်လျှောက်တွင်လည်း ငွေစက္ကူအတုများဖြင့် ဈေးဝယ်သုံးစွဲခဲ့သည်ဟု သိရှိရသည်။

ကျန်ရှိသောငွေစက္ကူအတုများမှာ မာမာဝင်းနှင့် ခင်သီတာလွင်တို့ထံတွင် ရှိကြောင်းသိရသဖြင့် နေ့လည် ၁၁ နာရီ မိနစ် ၃၀ အချိန်ခန့်တွင် ၎င်းတို့၏နေအိမ်အား ဝင်ရောက်ရှာဖွေခဲ့ရာ တရားခံ မာမာဝင်း (ဘ)ဦးကျော်ဇံ၊ (၃၉)နှစ်နှင့် ခင်သီတာလွင် (ဘ)ဦးညီသန်းလွင် တို့ နှစ်ဦးအား ငွေစက္ကူအတု တစ်သောင်း ကျပ်တန် ၂၂၉ ရွက်နှင့်အတူ ထပ်မံဖမ်းဆီး ရမိခဲ့ကြောင်း သိရှိရသည်။

ငွေစက္ကူအတုနှင့်ပတ်သက်၍ ဖမ်းဆီးရမိတရားခံသုံးဦးအား တောင်ကုတ်မြို့မရဲစခန်းတွင် မြန်မာနိုင်ငံဗဟိုဘဏ်ဥပဒေပုဒ်မ ၁၀၅/၁၀၆ ဖြင့် အမှုဖွင့်အရေးယူထားကြောင်း သိရှိရသည်။

Photo – ရခိုင်နေ့စဥ်