မန္တလေးငလျင်ကြီးဒဏ်သင့်ဒေသများအတွက် အလှူငွေများစွာကိုလက်ခံရရှိထားသည်ဟု အမျိုးသားသဘာဝဘေးအန္တရာယ်ဆိုင်ရာစီမံခန့်ခွဲမှုကော်မတီဥက္ကဋ္ဌ၊ နစက ဒု-ဥက္ကဋ္ဌ၊ ဒု-ဗိုလ်ချုပ်မှူးကြီးစိုးဝင်းမှ ဧပြီ ၂၅ ရက်မွန်းလွဲပိုင်းကကျင်းပသည့် အမျိုးသားသဘာဝဘေးအန္တရာယ်ဆိုင်ရာ စီမံခန့်ခွဲမှုကော်မတီအ စည်းအဝေးတွင် ပြောကြားခဲ့ခြင်းဖြစ်သည်။
” ပြည်တွင်း/ပြည်ပ စေတနာရှင်အလှူရှင်တွေက နိုင်ငံတော်အစိုးရနဲ့ သက်ဆိုင်ရာ ပြည်နယ်နှင့်တိုင်းဒေသကြီးအစိုးရအဖွဲ့တွေကို အလှူငွေတွေပေးအပ်လှူဒါန်းရာမှာ ဧပြီ ၂၄ ရက်အထိ ငွေကျပ် (၁၁၅ ဒသမ ၈၇၆)ဘီလီယံကျော်၊ အမေရိကန်ဒေါ်လာ(၂ ဒသမ ၄၃၇)သန်းကျော်၊ ကိုရီးယားဝမ်(၅)သန်း၊ အိန္ဒိယရူပီး(၁၅)သန်း၊ ထိုင်းဘတ်(၂)သန်းနဲ့ စင်ကာပူဒေါ်လာ(၃,၁၅၀)လက်ခံရရှိထားပါတယ်”ဟု နစက ဒု-ဥက္ကဋ္ဌက ပြောသည်။
အဆိုပါ လက်ခံရရှိထားသည့် အလှူငွေများအား အမျိုးသားသဘာဝဘေးအန္တရာယ်စီမံခန့်ခွဲမှု ကော်မတီ၏ ငွေစာရင်းတွင်ထည့်သွင်းထားကာ စနစ်တကျဖြင့် ကူညီကယ်ဆယ်ရေးလုပ်ငန်းများနှင့် ပြန်လည်ထူထောင်ရေးလုပ်ငန်းများတွင် အသုံးပြုဆောင်ရွက်လျက်ရှိသည်ဟု ပြောသည်။
ထို့ပြင် မန္တလေးငလျင်ကြီးလှုပ်ခတ်ပြီးချိန်တွင် နိုင်ငံတကာမှ ကူညီကယ်ဆယ်ရေးအဖွဲ့များကိုစေလွှတ်ပေးခဲ့ရာ နိုင်ငံပေါင်း(၂၆)နိုင်ငံမှ ယနေ့အချိန်ထိ လေယာဉ်ပေါင်း(၁၄၇)စီး၊ သင်္ဘော(၇)စီး၊ ကား (၂၃)စီးတို့ဖြင့် အရေးပေါ်ကယ်ဆယ်ရေးအဖွဲ့ဝင်ပေါင်း(၂,၀၉၅)ဦးရောက်ရှိခဲ့သည်ဟု ပြောသည်။
“ထောက်ပံ့ရေးပစ္စည်းတန်ချိန်(၂,၆၃၅ ဒသမ ၉၂) တန်နဲ့ ကယ်ဆယ်ရေးပစ္စည်းတန်ချိန်(၁,၁၉၇ ဒသမ ၁၂)တန်(စုစုပေါင်းတန်ချိန် ၃,၈၃၃ ဒသမ ၈၄ တန်) ပေးပို့လှူဒါန်းကူညီကြတာကို ဝမ်းမြောက်ဖွယ်တွေ့ရပါတယ်”ဟု နစက ဒု-ဥက္ကဋ္ဌက ပြောသည်။
ထို့အတူ နိုင်ငံတကာဆေးကုသရေးအဖွဲ့များအနေဖြင့်လည်း စစ်ကိုင်းတိုင်း၊ မန္တလေးတိုင်းနှင့်နေပြည် တော်တို့တွင် ယာယီဆေးရုံဆေးခန်းများဖွင့်လှစ်၍ အရေးပေါ်ကုသမှုများနှင့် ကျန်းမာရေးစောင့်ရှောက်မှုများဆောင်ရွက်ပေးလျက်ရှိရာ ယနေ့အထိနိုင်ငံပေါင်း(၆)နိုင်ငံမှ ဆေးကုသရေးအဖွဲ့ဝင်အင်အား(၃၃၇)ဦးက နိုင်ငံအလိုက်အဖွဲ့များခွဲ၍ ကျန်းမာရေးဝန်ကြီးဌာနမှ ကျန်းမာရေးဝန်ထမ်းများနှင့်ပူးပေါင်း၍ ဆေးကုသမှုလုပ်ငန်းများကို ဆောင်ရွက်လျက်ရှိသည်ဟု နစက ဒု-ဥက္ကဋ္ဌက ပြောကြားခဲ့သည်။