စင်ကာပူ ဇန်နဝါရီ ၃ ရက်
စင်ကာပူနှင့် အမေရိကန်ပြည်ထောင်စုတို့သည် ၂၀၂၆ ခုနှစ်တွင် ကျရောက်မည့် နှစ်နိုင်ငံသံတမန်ဆက်ဆံရေး နှစ် ၆၀ ပြည့် အထိမ်းအမှတ်အချိန်ဖြစ်၍ ၎င်းတို့၏ မိတ်ဖက်ဆက်ဆံရေးကို ထပ်လောင်းအတည်ပြုကာ နှစ်သစ်ကို စတင်လိုက်ကြောင်းသိရှိရသည်။
စင်ကာပူဝန်ကြီးချုပ် လောရန့်စ် ဝေါင်းသည် အမေရိကန်သမ္မတ ဒေါ်နယ်ထရမ့်ပ်နှင့် သောကြာနေ့တွင် ဖုန်းဖြင့် ဆက်သွယ်စကားပြောဆိုခဲ့ကြောင်း စင်ကာပူနိုင်ငံခြားရေးဝန်ကြီးဌာန (အမ်အက်ဖ်အေ) က သတင်းထုတ်ပြန်ခဲ့သည်။
“ဝန်ကြီးချုပ် လောရန့်စ် ဝေါင်းနဲ့ သမ္မတ ထရမ့်ပ်တို့ဟာ ၂၀၂၆ ခုနှစ်မှာ စင်ကာပူနဲ့ အမေရိကန်ပြည်ထောင်စုကြား သံတမန်ဆက်ဆံရေး ထူထောင်ခဲ့ခြင်း နှစ် ၆၀ ပြည့်မြောက်တဲ့အကြောင်းကို မှတ်တမ်းတင် ပြောကြားခဲ့ကြပါတယ်” ဟု ဝန်ကြီးဌာန၏ သတင်းထုတ်ပြန်ချက်တွင် ဖော်ပြထားပါသည်။
၎င်းတို့နှစ်ဦးအနေဖြင့် ကဏ္ဍပေါင်းစုံတွင် ဖြန့်ကျက်ဆောင်ရွက်လျက်ရှိသော နှစ်ဦးနှစ်ဖက် အကျိုးရှိစေသည့် မိတ်ဖက်ဆက်ဆံရေးကို ရေရှည်ခိုင်မြဲရေးအတွက် ထပ်လောင်းအတည်ပြုခဲ့ကြပြီး၊ လက်ရှိ နယ်ပယ်များတွင် ပူးပေါင်းဆောင်ရွက်မှုအား ပိုမိုလေးနက်စေရန်နှင့် နယ်ပယ်သစ်များသို့ တိုးချဲ့ သွားရန် မျှော်လင့်ကြောင်း ပြောကြားခဲ့ကြသည်။
လာမည့်ဒီဇင်ဘာလတွင် ဖလော်ရီဒါပြည်နယ်၊ မိုင်ယာမီမြို့၌ ကျင်းပမည့် ဂျီ-၂၀ ထိပ်သီး အစည်းအဝေးသို့ စင်ကာပူနိုင်ငံကို ဖိတ်ကြားခဲ့သည့်အတွက် ဝန်ကြီးချုပ် လောရန့်စ် ဝေါင်းက သမ္မတ ထရမ့်ပ်ကို ကျေးဇူးတင်ရှိကြောင်း စင်ကာပူနိုင်ငံခြားရေးဝန်ကြီးဌာန က ထည့်သွင်းပြောကြားခဲ့ပါ သည်။
“စင်ကာပူနိုင်ငံအနေနဲ့ အမေရိကန်ရဲ့ ဂျီ-၂၀ လုပ်ငန်းစဉ်တွေမှာ ပါဝင်ကူညီဖို့နဲ့ အားလုံးအတွက် အကျိုးစီးပွားရေးတိုးတက်မှုကို ဖော်ဆောင်ပေးဖို့ မျှော်လင့်နေပါတယ်” ဟု သတင်းထုတ်ပြန်ချက်တွင် ဖော်ပြထားပါသည်။ ဝန်ကြီးချုပ် လောရန့်စ် ဝေါင်းက ၎င်း၏ လူမှုကွန်ရက်စာမျက်နှာတွင် စင်ကာပူနိုင်ငံသည် အဆိုပါ ထိပ်သီးအစည်းအဝေးတွင် “အပြုသဘောဆောင်သည့် အခန်းကဏ္ဍ” မှ ပါဝင်သွားမည်ဖြစ်ပြီး၊ တိုးတက်မှုနှင့် တည်ငြိမ်မှုအတွက် ဘုံရည်မှန်းချက်များတွင် ပါဝင်ကူညီသွားမည်ဖြစ်ကြောင်း ရေးသားခဲ့ကြောင်း သိရှိရပါသည်။
Ref: ဆော့ချိုင်းနားမောနင်းပို့စ်