ဂျပန်၊ ဖိလစ်ပိုင်နှင့် အမေရိက တို့ ပိုမိုနက်ရှိုင်းစွာပူးပေါင်းမည်ဟု ကတိပြု

ဂျပန်၊ ဖိလစ်ပိုင်နှင့် အမေရိကတို့သည် အာရှ၏ ရေပြင်ပိုင်နက်တွင် တင်းမာမှုများမြင့်တက်နေမှုနှင့် ရင်ဆိုင်ကြုံ‌ေတွ့‌ေနရသဖြင့် သုံးနိုင်ငံအစီအစဉ်ဖြင့် ပိုမိုနက်ရှိုင်းစွာ ပူးပေါင်းဆောင်ရွက်သွားရန် ကတိပြုခဲ့ကြကြောင်း ခေါင်းဆောင်သုံးဦး ဖုန်းဆက်သွယ်ပြောဆိုခဲ့အပြီးတွင် အဆိုပါသုံးနိုင်ငံက ထုတ်ဖော်ပြောကြားလိုက်သည်။

ဂျပန်ဝန်ကြီးချုပ် ရှီဂီရူ အီရှီဘာ၊ ဖိလစ်ပိုင်သမ္မတ ဖာဒီနန်မားကို့စ် ဂျူနီယာနှင့် ရာထူးမှဆင်းတော့မည့် အမေရိကန်သမ္မတ ဂျိုးဘိုင်ဒင်တို့သည် အာရှစံတော်ချိန် တနင်္လာနေ့မနက်ပိုင်းက အွန်လိုင်းမှတဆင့် တွေ့ဆုံခဲ့ကြသည်။ စီးပွားရေး၊ ရေကြောင်းနှင့် နည်းပညာဆိုင်ရာ ပူးပေါင်းဆောင်ရွက်မှု ပိုမို ခိုင်မာ အားကောင်း လာစေရေးနှင့် နက်ရှိုင်းစေရေး ကို ခေါင်းဆောင်များက သဘောတူခဲ့ကြသည်ဟု မားကို့စ်၏ ဆက်ဆံရေးရုံးက ပြောကြားခဲ့သည်။

နိုင်ငံတကာဥပဒေ၊ ဒေသတွင်းလုံခြုံရေးဆိုင်ရာ ကိစ္စရပ်များနှင့်ပတ်သက်၍ ပြီးခဲ့သည့်နှစ် ဧပြီလအတွင်းက ဝါရှင်တန်တွင် မားကို့စ်၊ ဘိုင်ဒင်နှင့် ယခင်ဂျပန်ဝန်ကြီးချုပ် ဖူမီယို ကီရှီဒါတို့၏ ပထမဆုံးအကြိမ် အလားတူ သုံးနိုင်ငံထိပ်သီးအစည်းအဝေးအပြီးတွင် ယခုကဲ့သို့ ဆက်သွယ်တွေ့ဆုံခဲ့ကြခြင်းဖြစ်သည်။

လာမည့်တနင်္လာနေ့တွင် ရာထူးမှ နုတ်ထွက်ရတော့မည့် ဂျိုးဘိုင်ဒင်က သူ့နေရာကို ဆက်ခံမည့် ရွေးကောက်ခံသမ္မတ ဒေါ်နယ်ထရမ့်ပ်နှင့်ပတ်သက်၍ သူ အကောင်းမြင်ကြောင်းနှင့် မိတ်ဖက်ဆက်ဆံရေးကို ဆက်လက်ဖော်ဆောင်ခြင်း၏ တန်ဖိုးကို မြင်တွေ့ရလိမ့်မည်ဟု ပြောဆိုကြောင်း မနီလာ၏ သတင်းထုတ်ပြန်ချက်တွင် ဖော်ပြခဲ့သည်။

သုံးနိုင်ငံ သံတမန်ဆက်ဆံရေးကို နက်ရှိုင်းအောင်မြှင့်တင်ကာ အကျိုးကျေးဇူးများကို ဆက်လက်ထိန်းသိမ်းထားမည်ဟု ယုံကြည်ကြောင်း မားကို့စ်က ပြောကြားခဲ့သည်။

တောင်တရုတ်ပင်လယ်တွင် တရုတ်နိုင်ငံ၏ အန္တရာယ်ရှိပြီး ဥပဒေမဲ့သော အပြုအမူများကို ခေါင်းဆောင်သုံးဦးက ဆွေးနွေးခဲ့ကြကြောင်းနှင့် အင်ဒို-ပစိဖိတ်ဒေသတွင် ဆက်လက်ပူးပေါင်းဆောင်ရွက်ရေးသည် အရေးကြီးကြောင်း တို့ကို သဘောတူခဲ့ကြသည်ဟု အိမ်ဖြူတော်၏ သတင်းထုတ်ပြန်ချက်တွင် ဖော်ပြထားသည်။

Ref: ယူအက်စ်နူးစ်