ယနေ့ မေလ ၁၃ ရက်တွင် အိန္ဒိယလူမျိုး ကမ္ဘာကျော်ငြိမ်းချမ်းရေးသံတမန်နှင့် လူမှုရေးခေါင်းဆောင်တစ်ဦး ဖြစ်သည့် ဂုရုကြီး ဆရီဆရီ ရှာဗီရှန်ကာ ၏ နှစ်(၇၀)ပြည့်မွေးနေ့ ဂုဏ်ပြုပွဲကို ရန်ကုန်မြို့၌ ကျင်းပခဲ့သည်။
အဆိုပါ အခမ်းအနားသို့ သံတမန်များ၊ The Art of Living (ရန်ကုန်)မှ တာဝန်ရှိသူများနှင့် ဧည့်သည်တော်များ စွာတက်ရောက်ခဲ့သည်။
ရှေးဦးစွာ အခမ်းအနားအား မြန်မာနိုင်ငံဆိုင်ရာ အိန္ဒိယသံအမတ်ကြီး၊ မြန်မာနိုင်ငံဆိုင်ရာ နီပေါသံအမတ်ကြီး နှင့် The Art of Living ဒါရိုက်တာများမှ ဆီမီးထွန်းညှိဖွင့်လှစ်ခဲ့သည်။
ထို့နောက် The Art of Living ဒါရိုက်တာတစ်ဦးမှ ကြိုဆိုနှုတ်ခွန်းဆက်စကားပြောကြားခဲ့သည်။
ဆက်လက်၍ အခမ်းအနားတွင် အိန္ဒိယရိုးရာအကအလှများဖြင့် ဖျော်ဖြေတင်ဆက်ခြင်း၊ ဂုရုကြီးအကြောင်းကို ဗီဒီယိုဖြင့် ပြသတင်ဆက်ခြင်း၊ မြန်မာနိုင်ငံဆိုင်ရာ အိန္ဒိယသံအမတ်ကြီးမှ အမှာစကားပြောကြားခြင်း၊ မြန်မာနိုင်ငံဆိုင်ရာ နီပေါသံအမတ်ကြီးမှ အမှာစကားပြောကြားခြင်း၊ မြန်မာ့ရိုးရာအကအလှများဖြင့် ဖျော်ဖြေတင်ဆက်ခြင်း၊ ချင်းရိုးရာအကအလှများဖြင့် ဖျော်ဖြေတင်ဆက်ခြင်း၊ ဂုရုကြီး၏အသံဖြင့် Guided meditation တရားထိုင်ခြင်းကို (၁၀) မိနစ်ခန့် ရှုမှတ်ခြင်း နှင့် The Art of Living ဒါရိုက်တာတစ်ဦးမှ ကျေးဇူးတင်စကားပြောကြားကာ အခမ်းအနား ပြီးမြောက်အောင်မြင်ခဲ့သည်။
အိန္ဒိယလူမျိုးဖြစ်သည့် ဂုရုကြီး ဆရီဆရီ ရှာဗီရှန်ကာ သည် စိတ်ပိုင်းဆိုင်မြှင့်တင်ပေးသည့် ဒသနဆရာ၊ လူသားချင်းစာနာထောက်ထားရေး တက်ကြွလှုပ်ရှားသူနှင့် ငြိမ်းချမ်းရေးသံတမန်တစ်ဦးအဖြစ် လူသိများသည့် ကမ္ဘာကျော်ပုဂ္ဂိုလ်တစ်ဦးဖြစ်သည်။
ဂုရုကြီးအား ၁၉၅၆ ခုနှစ်၊ မေလ ၁၃ ရက်တွင် အိန္ဒိယနိုင်ငံ တမီးလ်နာဒူးပြည်နယ်၊ ပါပနာဆမ်မြို့တွင် မွေးဖွားခဲ့သည်။
ဂုရုကြီးသည် ကမ္ဘာကျော် အသက်ရှူခြင်းနှင့် တရားထိုင်ခြင်းဆိုင်ရာ နည်းလမ်းဖြစ်သည့် Sudarshan Kriya (ဆူဒါရှန် ခရီယာ) ကို ၁၉၈၁ ခုနှစ်တွင် စတင်ရှာဖွေတွေ့ရှိခဲ့ပြီးနောက် နိုင်ငံတကာအဆင့် လူမှုရေးနှင့် စိတ်ပိုင်းဆိုင်ရာ ငြိမ်းချမ်းရေး၊ စိတ်ဖိစီးမှုလျှော့ချရေးနှင့် လူမှုအကျိုးပြုအဖွဲ့အစည်းအဖြစ် The Art of Living ဖောင်ဒေးရှင်းကို တည်ထောင်ခဲ့သည်မှာ ၄၅ နှစ်တိုင်ခဲ့ပြီဖြစ်သည်။
ယခုအခါ ဂုရုကြီး၏ မွေးနေ့ပွဲကို ကမ္ဘာတစ်ဝန်းမှ ခေါင်းဆောင်များနှင့် ဧည့်ပရိသတ်များသည် ရက်များခွဲကာ စည်ကားသိုက်မြိုက်စွာ နိုင်ငံအလိုက်ကျင်းပလျက်ရှိသည်။
ဂုရုကြီး သည် ပြီးခဲ့သည့် ၂၀၂၅ ခုနှစ်၊ ဖေဖော်ဝါရီလ ၇ ရက်မှ ၉ ရက်အထိ မြန်မာနိုင်ငံသို့ လာရောက်ခဲ့သေးသည်။
မြန်မာနိုင်ငံခရီးစဉ်အတွင်း ရန်ကုန်မြို့သို့ လာရောက်စဉ် ရွှေတိဂုံစေတီတော်သို့ သွားရောက်ဖူးမြော်ခဲ့ကာ၊ ရန်ကုန်မြို့ အမျိုးသားကဇာတ်ရုံတွင် မြန်မာပြည်သူများအတွက် စိတ်ဖိစီးမှုလျှော့ချရေးနှင့် အသက်ရှူနည်းသင်တန်းများ ပို့ချခြင်း နှင့် တရားရှုမှတ်ခြင်းဆိုင်ရာ ဟောပြောချက်များ ပြုလုပ်ခဲ့သည်။