ဂရိဒုံးကျည်များ တူကီယေး၏ဂျက်လေယာဉ်ကိုအချိန် ပြည့် နောက်မှ လိုက်၍ချိန်ရွယ်ခဲ့သဖြင့် တင်းမာမှုမြင့်တက်

ဂရိဒုံးကျည်များ တူကီယေး၏ဂျက်လေယာဉ်ကိုအချိန် ပြည့် နောက်မှ လိုက်၍ချိန်ရွယ်ခဲ့သဖြင့် တင်းမာမှုမြင့်တက်

နိုင်ငံတကာလေပိုင်နက်အတွင်း ကင်းထောက်တာဝန်ထမ်းဆောင်ရွက်နေသည့် တူကီယေး၏ F – 16 ဂျက်လေယာဉ်များအား ဂရိမြေပြင်မှဝေဟင်ပစ်ဒုံးကျည်များကလိုက်လံချိန်ရွယ်ခဲ့သည်ဟု တူကီယေးနိုင်ငံပိုင် Anadolu အေဂျင်စီကပြောကြားခဲ့သည်။

တူကီယေး၏ယခုစွပ်စွဲချက်သည် ၎င်း၏အိမ်နီးချင်းနိုင်ငံဖြစ်သကဲ့သို့ နေတိုးအဖွဲ့ဝင်နိုင်ငံလည်းဖြစ်သည့် ဂရိနိုင်ငံသည် တူကီယေးနိုင်ငံပိုင် F – 16 ဂျက်လေယာဉ်များအား မြေထဲပင်လယ်နှင့်အေဂျီယံပင်လယ်အထက်တွင် ပစ်မှတ်ထားကာလိုက်လံချိန်ရွယ်ခဲ့သည်ဟု စွပ်စွဲထားခြင်းဖြစ်သည်။

Crete ကျွန်းပေါ်ရှိဂရိ S – 300 ဒုံးကျည်စနစ်၏ရေဒါသည် တူကီယေးဂျက်လေယာဉ်များအား ‌ေနာက်မှတချိန် လုံးလိုက်လံချိန်ရွယ်ခဲ့သည်ဟု ကာကွယ်ရေးဝန်ကြီးဌာန၏ သတင်းအရင်းအမြစ်ကိုအားကိုး၍ နိုင်ငံပိုင်Anadolu သတင်းဌာနကတနင်္ဂနွေနေ့တွင်ဖော်ပြထားသည်။

တူကီယေး၏ F – 16 တိုက်လေယာဉ်များသည်ဂရိနိုင်ငံအနောက်ပိုင်း ရော့ဒ်ကျွန်းစုအနီး၌ အမြင့် ၃,၀၀၀ မီတာ(ပေ ၁,၀၀၀) အမြင့်၌ပျံသန်းနေစဉ် ရုရှားထုတ် S – 300 ၏ပစ်မှတ်ခြေရာခံရေဒါကအဆိုပါ တူကီယေးလေယာဉ်များအား လိုက်လံချိန်ရွယ်ခဲ့ခြင်းဖြစ်သည်ဟု အစီရင်ခံစာတွင်ဖော်ပြထားသည်။သို့သော် တူကီယေးလေယာဉ်များသည် ရန်လိုသည့်အိမ်နီးချင်းနိုင်ငံရှိနေသော်လည်း တာဝန်ပြီးဆုံးအောင်ထမ်း‌ေဆာင်နိုင်ခဲ့ပြီး သက်ဆိုင်ရာအခြေစိုက်စခန်းများသို့ ပြန်လည်ဆင်းသက်နိုင်ခဲ့သည်ဟုဖော်ပြထားသည်။

ထိုကဲ့သို့သောရေဒါစနစ်ဖြင့်လိုက်လံချိန်ရွယ်ပိတ်ဆို့ခြင်းသည် နေတိုးအဖွဲ့၏ထိ‌ေတွ့မှုစည်းမျဉ်းများအရ ရန်လိုသည့်လုပ်ရပ်အဖြစ်ယူဆကြောင်းသိရှိရသည်။သို့သော်ဂရိနိုင်ငံဘက်က အဆိုပါစွပ်စွဲမှုများကိုပယ်ချခဲ့ပြီး ဂရိ၏ S – 300 ဒုံးကျည်စနစ်သည် တူကီယေး၏ F – 16 တိုက်လေယာဉ်များအား မည်သည့်အခါကမျှချိန်ရွယ်ပိတ်ဆို့ခြင်းမပြုခဲ့ဟု သတင်းရင်းမြစ်တစ်ခု၏ပြောကြားချက်အရသိရကြောင်း ဂရိနိုင်ငံပိုင် Ert ရုပ်မြင်သံကြားဌာနကပြောကြားခဲ့သည်။

ပြီးခဲ့သည့်သီတင်းပတ်ကလည်း တူကီယေးသည် ဂရိစစ်သံမှူးအားဆင့်ခေါ်ကာ မဟာမိတ်အဖွဲ့အတွက်လုပ်ဆောင်နေသည့် တူကီယေး၏ F – 16 တိုက်လေယာဉ်များအား ဂရိ F – 16 တိုက်လေယာဉ်များက နှောင့်ယှက်ခဲ့သည်ဟုစွပ်စွဲခဲ့ပြီး နေတိုးအဖွဲ့သို့လည်း တိုင်ကြားခဲ့သည်။

ထိုအချိန်ကဂရိလေယာဉ်မှူးများသည် တူကီယေး၏လေယာဉ်အား မြေထဲပင်လယ်အရှေ့ခြမ်း၌ ရေဒါဖြင့်ခြေရာခံကာချိန်ရွယ်ထားသည့်အတွက် တူကီယေးဘက်မှလိုအပ်သောတုံ့ပြန်မှုကိုပေးအပ်ခဲ့ပြီး မိမိတို့၏လေယာဉ်များကို အဆိုပါဒေသမှချက်ချင်းထွက်ခွာရန် တွန်းအားပေးခဲ့ရသည်ဟု နိုင်ငံပိုင်မီဒီယာ Anadolu ကပြောကြားခဲ့သော်လည်း အသေးစိတ်အချက်အလက်များကိုပြောကြားခဲ့ခြင်းမရှိပေ။

ဂရိဘက်ကလည်း တူကီယေး၏ပြောဆိုချက်ကိုငြင်းပယ်ခဲ့သည်။ယခုကဲ့သို့ပြုလုပ်ရခြင်းမှာ တူကီယေး၏ဂျက်လေယာဉ်ငါးစင်းသည် ကြိုတင်အကြောင်းကြားခြင်းမရှိပဲ အမေရိကန်၏ B – 52 ဗုံးကျဲလေယာဉ်နှင့်အတူပေါ်လာခြင်းဖြစ်သောကြောင့်ဖြစ်သည်ဟုဆိုခဲ့သည်။

တူကီယေးနှင့်ဂရိနှစ်နိုင်ငံလုံးသည် နေတိုးအဖွဲ့ဝင်နိုင်ငံများဖြစ်ကြသော်လည်း ၎င်းတို့နှစ်နိုင်ငံကြားတွင် အေဂျီယံပင်လယ်တွင်းပိုင်နက်၏ ရပိုင်ခွင့်ကိုတောင်းဆိုမှုနှင့် ဝေဟင်ပိုင်နက်ဆိုင်ရာပြဿနာများအပါအဝင် အခြားသောအငြင်းပွားဖွယ်ပြဿနာများကြောင့် ဆယ်စုနှစ်များစွာမသင့်မမြတ်ဖြစ်ခဲ့ကြသည်။ထိုအငြင်းပွားမှုများကြောင့်ပင် လွန်ခဲ့သည့်ရာစုနှစ်ဝက်အတွင်း သုံးကြိမ်တိုင်တိုင်စစ်ဖြစ်လုဖြစ်ခင်အနေအထားကိုရောက်စေခဲ့သည်။

၂၀၂၀ ပြည့်နှစ်ကလည်း ဂရိနှင့်ဆိုက်ပရပ်စ်တို့က သီးသန့်စီးပွားရေးဇုန်များအဖြစ်တောင်းဆိုထားသည့် မြေထဲပင်လယ်ဒေသများတွင် ရှာဖွေတူးဖော်ခွင့်များနှင့်ပတ်သက်၍ တင်းမာမှုများမြင့်တက်လာပြီး ရေတပ်ဆိုင်ရာအငြင်းပွားမှုများကိုပါဖြစ်စေခဲ့သည်။

Source -အယ်ဂျာဇီးယား