ပါရီ၊ ဇန်နဝါရီလ ၅
အမေရိကန်သမ္မတ ဒေါ်နယ်ထရမ့်ပ့်က အမေရိကန်နိုင်ငံကာကွယ်ရေးအတွက် ဂရင်းလန်းကျွန်းကို လိုအပ်ကြောင်း တနင်္ဂနွေနေ့တွင် အလေးပေးပြောကြားခဲ့ပြီးနောက် ပြင်သစ်နိုင်ငံက ဒိန်းမတ်နိုင်ငံနှင့်အတူ “တစ်သားတည်းရှိကြောင်း” တနင်္လာနေ့တွင် ထုတ်ဖော်ပြောကြားခဲ့သည်ဟု သိရသည်။
“နယ်နိမိတ်တွေကို အင်အားသုံးပြီး ပြောင်းလဲလို့မရပါဘူး” ဟု ပြင်သစ်နိုင်ငံခြားရေးဝန်ကြီးဌာန ပြောရေးဆိုခွင့်ရှိသူ ပါစကယ် ကွန်ဖာဗရူးက ပြင်သစ်အစိုးရပိုင် ရုပ်သံလိုင်း တေအက်ဖ်အံနှင့် ပြုလုပ်သည့် အင်တာဗျူးတစ်ခုတွင် ပြောကြားခဲ့သည်။
သမ္မတထရမ့်ပ့်က တနင်္ဂနွေနေ့တွင် သီ အက်တလန်တစ် မဂ္ဂဇင်းနှင့် ပြုလုပ်ခဲ့သည့် ဖုန်းအင်တာဗျူးတစ်ခု၌ အမေရိကန်နိုင်ငံအနေဖြင့် ဂရင်းလန်းကျွန်းကို “လုံးဝ” လိုအပ်ကြောင်း ပြောကြားခဲ့သည်။ အာတိတ်စက်ဝိုင်းအတွင်း တည်ရှိသည့် အဆိုပါကျွန်းသည် ဒိန်းမတ်နိုင်ငံ၏ အစိတ်အပိုင်းတစ်ခု ဖြစ်သည်။
အဆိုပါပြောကြားချက်ကို တုံ့ပြန်သည့်အနေဖြင့် ဒိန်းမတ်ဝန်ကြီးချုပ် မက်တီ ဖရက်ဒရစ်ဆင် က အမေရိကန်နိုင်ငံအနေဖြင့် ဂရင်းလန်းကျွန်းကို သိမ်းပိုက်ပိုင်ခွင့်မရှိကြောင်းနှင့် ရင်းနှီးသည့် မဟာမိတ်နိုင်ငံတစ်နိုင်ငံအပေါ်တွင်လည်းကောင်း၊ ဂရင်းလန်းပြည်သူများအပေါ်တွင်လည်းကောင်း ခြိမ်းခြောက်မှုများကို ရပ်တန့်ရန် အမေရိကန်အစိုးရကို တိုက်တွန်းကြောင်း ကြေငြာချက်တွင် ဖော်ပြထားသည်။
၂၀၂၅ ခုနှစ် ဇန်နဝါရီလတွင် တာဝန်စတင်ယူကတည်းက ထရမ့်ပ်သည် ဂရင်းလန်းကျွန်းကို ထိန်းချုပ်နိုင်ရန် စိတ်ဝင်စားကြောင်း အကြိမ်ကြိမ် ထုတ်ဖော်ပြောဆိုခဲ့ပြီး ၎င်း၏ပန်းတိုင်ကိုရရှိရန် “စစ်ရေး သို့မဟုတ် စီးပွားရေးအရ ဖိအားပေးမှုများ” အသုံးပြုနိုင်သည် ဟူသော အချက်ကိုလည်း ငြင်းဆိုမည်မဟုတ်ကြောင်း ပြောကြားထားသည်။
Ref: ရှင်းဟွာ