ပုသိမ်မြို့၊ ကမ်းနားလမ်းရှိ ကုန်စည်ဒိုင်ဝန်းအတွင်း ဆိုင်ခန်းနေရာချထားမှု စနစ်တကျရှိစေရေးနှင့် ကျူးကျော်ဆောက်လုပ်မှု မရှိရန်လုပ်ဆောင်မည်
ဧရာ၀တီတိုင်းဒေသကြီးဝန်ကြီးချုပ်ဦးအေးကျော်နှင့် တာဝန်ရှိသူများသည် ပုသိမ်မြို့၊ ကမ်းနားလမ်း ကုန်စည်ဒိုင်ဝန်းသို့ သွားရောက်၍ မြန်မာ့ဆိပ်ကမ်းအာဏာပိုင်၊ ပုသိမ်ဆိပ်ကမ်းပိုင် ကမ်းနားနယ် အမှတ်(၁)တံတားဝန်းရှိ ချောင်းသာ-ငွေဆောင်- မော်တင်ကားဂိတ်များ ပြုပြင်ဆောက်လုပ်ရန်အတွက် ကြည့်ရှုစစ်ဆေးခဲ့ကြောင်း သိရသည်။
ထို့ပြင် ဆိုင်ခန်းနေရာချထားမှုများ သတ်မှတ်နေရာများတွင် စနစ်တကျရှိစေရေး၊ ကျူးကျော်ဆောက်လုပ်မှုများမရှိစေရေး၊ ခရီးသည်နားနေဆောင်များ စနစ်တကျရှိစေရေး၊ ကုန်စည်ဒိုင်ဝန်းအတွင်း သန့်ရှင်းသပ်ရပ်မှုရှိစေရေး တိုင်းဒေသကြီး ဝန်ကြီးချုပ်က မှာကြားခဲ့ကြောင်း သိရသည်။
ဧရာဝတီတိုင်းဒေသကြီးအတွင်းရှိ တိုင်း၊ ခရိုင်၊ မြို့နယ်များနှင့် ရပ်ကွက်၊ ကျေးရွာများတွင် သန့်ရှင်းသာယာလှပရေး၊ ဘုရားစေတီပုထိုးများ၊ ဘုန်းတော်ကြီးကျောင်းများ၊ စာသင်ကျောင်း များ၊ ဆေးရုံများနှင့် လမ်းဘေးဝဲယာများ သန့်ရှင်းသာယာလှပရေးအတွက် တပ်ရင်းတပ်ဖွဲ့များ၊ ဌာနဆိုင်ရာများ၊ ဒေသခံပြည်သူများမှ အပတ်စဉ် စုပေါင်းသန့်ရှင်းရေးကို ဆောင်ရွက်လျက်ရှိရာ တိုင်းဒေသကြီးဝန်ကြီးချုပ် ဦးအေးကျော်သည် မေ ၉ ရက်၊ နံနက်ပိုင်းက တာဝန်ရှိသူများနှင့်အတူ ပုသိမ်မြို့အတွင်း စုပေါင်းသန့်ရှင်းရေး ဆောင်ရွက်နေမှုများကို လှည့်လည်ကြည့်ရှု စစ်ဆေးခဲ့ကြောင်း သိရသည်။