မန္တလေးတိုင်း၊ချမ်းမြသာစည်မြို့နယ်ရှိ လဝက ရုံးရှေ့နှင့်ရပ်ကွက်အုပ်ချုပ်ရေးမှူးရုံးရှေ့တို့တွင် သြဂုတ် ၁၈ ရက် နေ့လည်ပိုင်းက လက်ပစ်ဗုံးပေါက်ကွဲမှုများဖြစ်ပွား၍ အရပ်သား ၇ ဦးထိခိုက်ဒဏ်ရာများရရှိခဲ့ကြောင်း သိရသည်။
ယမန်နေ့နေ့လည် ၃ နာရီခန့်က အမည်မသိအမျိုးသား ၂ ဦးသည် ဆိုင်ကယ်ဖြင့်မောင်းနှင်လာကာ ချမ်းမြသာစည်မြို့နယ်၊ချမ်းမြသာစည်(တောင်) ရပ်ကွက်ရှိ လဝက ရုံးရှေ့သို့ရောက်ရှိလာပြီး လက်ပစ်ဗုံးဖြင့်ပစ်ပေါက်၍ မောင်းနှင်ထွက်ပြေးသွားခဲ့ကြသည်။
လက်ပစ်ဗုံးသည် လဝက ရုံးရှိ ဆိုင်ကယ်များထားသည့်နေရာတွင် ကျရောက်ပေါက်ကွဲခဲ့သဖြင့် မှတ်ပုံတင်လာရောက်ပြုလုပ်သူများအပါအဝင် အရပ်သား အမျိုးသား ၃ ဦးနှင့်အမျိုးသမီး ၄ ဦး(စုစုပေါင်း ၇ ဦး)တို့တွင် ထိခိုက်ဒဏ်ရာများရရှိခဲ့ကြောင်း သိရသည်။
“မှတ်ပုံတင်လာလုပ်တဲ့လူတွေရယ် ရုံးနားမှာရှိတဲ့ လဖက်ရည်ဆိုင်ပိုင်ရှင်ရယ် စျေးရောင်းနေတဲ့လူရယ် ဗုံးစထိမှန်ဒဏ်ရာတွေရသွားတယ် မစိုးရိမ်ရပါဘူး လူမှုကူညီရေးအသင်းကားတွေနဲ့ မန္တလေးပြည်သူ့ဆေးရုံကြီးကိုပို့ပေးခဲ့ပါတယ် လက်ပစ်ဗုံးနဲ့လာပစ်တဲ့လူ ၂ ယောက်ကိုဖမ်းဆီးရမိဖို့အတွက်လည်း ပိတ်ဆို့စစ်ဆေးတာတွေလုပ်နေပါတယ်” ဟု လုံခြုံရေးအဖွဲ့နှင့်နီးစပ်သူတစ်ဦးကပြောသည်။
ထို့ပြင် လဝက ရုံးရှေ့၌ ဗုံးပေါက်ကွဲမှုဖြစ်ပွားပြီးနောက် အမည်မသိအမျိုးသား ၂ ဦးသည် ချမ်းမြသာစည်(တောင်)ရပ်ကွက်၏ ရပ်ကွက်အုပ်ချုပ်ရေးမှူးရုံးကိုလည်း လက်ပစ်ဗုံးဖြင့်ထပ်မံပစ်ပေါက်ခဲ့ရာ လက်ပစ်ဗုံးသည် ရုံးရှေ့ရှိ ဘယ်ရီဂိတ်အနီးတွင်ကျရောက်ပေါက်ကွဲခဲ့ပြီး ထိခိုက်ဒဏ်ရာရရှိမှုနှင့်ပျက်စီးမှုမရှိခဲ့ကြောင်း သိရသည်။
