ခေတ်သစ်စစ်ပွဲများတွင် အဆင့်မြင့်နည်းပညာများကိုအသုံးပြုလာကြသည်ဟု နစက ဥက္ကဋ္ဌ၊ နိုင်ငံတော်ဝန်ကြီးချုပ်၊ တပ်မတော်ကာကွယ်ရေးဦးစီးချုပ် ဗိုလ်ချုပ်မှူးကြီးမင်းအောင်လှိုင်ကပြောသည်။
တပ်မတော်နည်းပညာတက္ကသိုလ် ဗိုလ်လောင်းသင်တန်းအမှတ်စဉ်(၂၆)သင်တန်းဆင်းဂုဏ်ပြုစစ်ရေးပြအခမ်းအနားအား ယနေ့ ဒီဇင်ဘာ ၁၂ ရက်နံနက်ပိုင်းက ပြင်ဦးလွင်မြို့ရှိ တပ်မတော် နည်းပညာတက္ကသိုလ်စစ်ရေးပြကွင်းတွင်ကျင်းပစဥ် မိန့်ခွန်းပြောကြားရာ၌ထည့်သွင်းပြောကြားခဲ့ခြင်းဖြစ်သည်။
ခေတ်သစ်စစ်ပွဲများကိုလေ့လာကြည့်ပါက အ ဆင့်မြင့်နည်းပညာများကိုအသုံးပြု၍ အီလက်ထရောနစ်စစ်ဆင်ရေးနှင့် သတင်းအချက်အ လက်စစ်ဆင်ရေးများကို ထိရောက်စွာပုံဖော်တိုက်ခိုက်နေကြသည်ဟု ပြောသည်။
” ဒါ့ကြောင့် မျက်မှောက်ခေတ်စစ်ပွဲတွေမှာ စစ်ဘက်ခေါင်းဆောင်တွေအနေနဲ့ အင်အားသာလွန်မှုထက် နည်းပညာသာလွန်မှုကို အထူးအလေးပေးဆောင်ရွက်လာကြပြီး ကာကွယ်ရေးဆိုင်ရာ မူဝါဒချမှတ်ရာမှာလည်း နည်းပညာရဲ့အခန်းကဏ္ဍက အလွန်အရေးပါတဲ့ အနေအထားကို ရောက်လာပြီဆိုတာတွေ့ရပါတယ်”ဟု ဗိုလ်ချုပ်မှူးကြီးမင်းအောင်လှိုင်ကပြောသည်။
ထို့ကြောင့် ပြောင်းလဲတိုးတက်နေသည့် စစ်မှုသိ ပ္ပံနှင့်နည်းပညာရပ်များကို သိရှိနားလည် အမီ လိုက်နိုင်ရန် မိမိတို့အနေဖြင့် စဉ်ဆက်မပြတ်လေ့လာသုတေသနပြုမှုများ၊ ကျွမ်းကျင်မှုရှိအောင် လေ့ကျင့်ဆောင်ရွက်မှုများကို လုပ်ဆောင်သွားကြရမည်ဖြစ်ကာ တာဝန်ကျသည့် စစ်မြေပြင်နှင့်လုပ်ငန်းနယ်ပယ်များတွင်လည်း လက်တွေ့ကျကျ အကျိုးရှိစွာပြန်လည်အသုံးချနိုင်အောင် ကြိုးစားလုပ်ဆောင်သွားကြရမည်ဟု မှာကြားသည်။
ထို့ပြင် ယနေ့ခေတ် စစ်ဘက်ဆိုင်ရာသိပ္ပံနှင့်နည်းပညာနယ်ပယ်တွင် ဉာဏ်ရည်တုနည်းပညာ(AI) ကို ပိုမိုအသုံးပြုလာကြ၍ ဉာဏ်ရည်တုနည်းပညာနှင့်ပတ်သက်ပြီး လေ့လာသုတေသနပြုမှုနှင့် စမ်းသပ်တီထွင်ထုတ်လုပ်မှုများကို အစဉ်တစိုက် ကြိုးပမ်းလုပ်ဆောင်သွားရမည်ဟု မှာကြားသည်။
ထို့အတူ မျက်မှောက်ခေတ်စစ်မြေပြင်သည် သ တင်းအချက်အလက်နည်းပညာ(Information Technology)ကိုအခြေခံ၍ Digitalized Battle Field အသွင်ဆောင်လာနေသဖြင့် သတင်းအချက်အလက်နည်းပညာများကို ခေတ်နှင့်အညီစဉ်ဆက်မပြတ်လေ့လာဆည်းပူးကာ သင်ကြားပေးလိုက်သည့် စစ်အတတ်ပညာများကို ကျွမ်းကျင်ပိုင်နိုင်စွာအသုံးချပြီး တိုက်ပွဲဝင်အသင့်(Fit For Fight)ဖြစ်သည့် အင်ဂျင်နီယာအရာရှိကောင်းများဖြစ်အောင်ကြိုးပမ်းသွားကြရမည်ဟု ဗိုလ်ချုပ်မှူးကြီးမင်းအောင်လှိုင်က မှာကြားခဲ့သည်။