ပြည်သူကို ချစ်သည့် ပါတီဖြစ်သည့်အတွက် ကိုယ်ကျိုးရှာမည့် ပါတီမဟုတ်ကြောင်း ရှမ်းနှင့်တိုင်းရင်းသားများဒီမိုက ရက်တစ်ပါတီ (ကျားဖြူ) ဥက္ကဋ္ဌ ဦးစိုင်းအိုက်ပေါင်းက ပေါ် ပြူလာနယူးစ်သို့ ပြောသည်။
ဒီဇင်ဘာ (၈) ရက် နံနက်ပိုင်းက ရန်ကုန်မြို့ရှိ Sky Star ဟိုတယ်တွင် ကျင်းပသည့် ရွေးကောက်ပွဲအောင်နိုင်ရေးနှင့် လူထုတွေ့ဆုံပွဲ အခမ်းအနားတွင် ပေါ်ပြူလာနယူးစ်သတင်းဌာနမှ “ကျားဖြူပါတီက အမတ်များအနေဖြင့် လွှတ်တော်ထဲရောက်ရင် ပြည်သူတွေအတွက် ဘာတွေအဓိကထားလုပ်ပေးမလဲ” ဆိုသည့်မေးခွန်းအပေါ် ပြန်လည်ဖြေကြားခဲ့ခြင်းဖြစ်သည်။
“လွှတ်တော်ထဲရောက်ရင် ပြည်သူတွေအတွက် အလုပ်လုပ်မယ်။ ကျွန်တော်တို့ပါတီက ကိုယ်ကျိုးရှာတဲ့ ပါတီမဟုတ်ဘူး။ ပြည်သူကိုချစ်တဲ့ပါတီ။ ပြည်သူအတွက်အလုပ်လုပ်မယ်။ ကိုယ်ကျိုးမရှာဘူး”ဟု ၎င်းက ပြောသည်။
လာမည့်ရွေးကောက်ပွဲတွင် ရှမ်းနှင့် တိုင်းရင်းသားများ ဒီမိုကရက်တစ်ပါတီ (ကျားဖြူ) မှ မွန်ပြည်နယ်၊ ကရင်ပြည်နယ်၊ ရန်ကုန်တိုင်း၊ ပဲခူးတိုင်း၊ မကွေးတိုင်း၊ နေပြည်တော်၊ စစ်ကိုင်းတိုင်း၊ မန္တလေး၊ ကချင်ပြည်နယ်နှင့် ရှမ်းပြည်နယ်တို့တွင် ကိုယ်စားလှယ်လောင်း (၅၇၆) ဦး ဝင်ရောက်ယှဉ်ပြိုင်သွားမည်ဖြစ်သည်။
” ရှမ်းနှင့် တိုင်းရင်းသားများဒီမိုကရက်တစ်ပါတီ (ကျားဖြူ) ဟာအရင်တုန်းက ရှမ်းနဲ့ကချင်မှာပဲ ပြိုင်ဖူးတယ်။ (၃) ကြိမ်လုံး။ ၂၀၁၀ မှာ တော်တော်များများနိုင်ခဲ့တယ်။ ကျွန်တော်တို့ကို ကြိုတင်မဲတွေက နှိပ်စက်ခဲ့တယ်။ အခုရွေးကောက်ပွဲဟာ လွတ်လပ်ပြီး တရားမျှတတဲ့ ရွေးကောက်ပွဲဆိုရင် ကျွန်တော်တို့ပါတီဟာ အနည်းဆုံး နံပါတ် (၂) ဖြစ်မယ်။ သမိုင်းကြောင်းအရလည်း ကောင်းတယ်” ဟု ပါတီဥက္ကဋ္ဌ ဦးစိုင်းအိုက်ပေါင်းက မိန့်ခွန်းတွင်ထည့်သွင်းပြောကြားခဲ့သည်။
ရှမ်းနှင့် တိုင်းရင်းသားများ ဒီမိုကရက်တစ်ပါတီအနေဖြင့် လာမည့်ရွေးကောက်ပွဲတွင် ပြည်သူ့လွှတ်တော်၌ ကိုယ်စားလှယ်လောင်း (၁၅၈) ဦး၊ အမျိုးသားလွှတ်တော်၌ ကိုယ်စားလှယ်လောင်း (၇၃) ဦး ၊ တိုင်းဒေသကြီးနှင့် ပြည်နယ်လွှတ်တော်၌ ကိုယ်စားလှယ်လောင်း (၃၃၇) ဦး ဝင်ရောက်ယှဉ် ပြိုင်သွားမည်ဖြစ်ကြောင်း သိရသည်။