နေပြည်တော်၊ ဥတ္တရသီရိမြို့နယ်ရှိ မြင်းစီးအားကစားကွင်း၌ မြန်မာနိုင်ငံမြင်းစီးအားကစားအဖွဲ့ချုပ်မှကြီးမှူး၍ ကီလိုမီတာ (၅၀) ခရီးရှည်ပြိုင်ပွဲ အရည်အချင်းစစ် မြင်းစီးပြိုင်ပွဲအား သြဂုတ် (၂၀) ရက် နံနက် (၆) နာရီကကျင်းပခဲ့သည်။
အဆိုပါ ပြိုင်ပွဲအား အိုလံပစ်အားကစားနည်းတစ်ခုဖြစ်သည့် မြင်းစီးအားကစားနည်းဖွံ့ဖြိုးတိုးတက်၍ နိုင်ငံတကာပြိုင်ပွဲများတွင် အောင်မြင်မှုရရှိစေရေး၊ မြင်းစီးအားကစားသမားများစွာ ပေါ်ထွက်လာစေရေးနှင့် ၂၀၂၅ ခုနှစ်တွင် ထိုင်းနိုင်ငံ၌ ကျင်းပမည့် အရှေ့တောင်အာရှအားကစားပြိုင်ပွဲတွင် ဝင်ရောက်ယှဉ်ပြိုင်နိုင်စေရေးတို့အတွက် ရည်ရွယ်ကျင်းပခြင်းဖြစ်ကြောင်း သိရသည်။
ပြိုင်ပွဲသို့ အားကစားနှင့် လူငယ်ရေးရာဝန်ကြီးဌာန ပြည်ထောင်စုဝန်ကြီး ဦးမင်းသိန်းဇံနှင့် တာဝန်ရှိသူများတက်ရောက်ကြည့်ရှုပးအားပေးခဲ့ကြပြီး ပြည်ထောင်စုဝန်ကြီးမှ ကီလိုမီတာ (၅၀) ခရီးရှည်ပြိုင်ပွဲအရည်အချင်းစစ် မြင်းစီးပြိုင်ပွဲကို တာလွတ်ပေးခဲ့ကြောင်း သိရသည်။
ထို့နောက် မြန်မာနိုင်ငံ မြင်းစီးအားကစားအဖွဲ့ချုပ် ဥက္ကဋ္ဌနှင့် တာဝန်ရှိသူများက ကီလိုမီတာ (၅၀) ခရီးရှည်ပြိုင်ပွဲ အရည်အချင်းစစ် မြင်းစီးပြိုင်ပွဲအား ဝင်ရောက်ယှဥ်ပြိုင်ခဲ့သည့် အားကစားသမား (၂၃) တွဲအနက် အောင်မြင်ခဲ့သည့် မြင်းနှင့်အားကစားသမား (၁၄) တွဲကို အောင်လက်မှတ်များပေးအပ်ချီးမြှင့်ခဲ့ကြသည်။
မြန်မာနိုင်ငံ မြင်းစီးအားကစားအဖွဲ့ချုပ်မှ မြင်းနှင့်အားကစားသမားများအား One Star အဆင့်ရရှိစေရန် ခရီးရှည်မြင်းစီးပြိုင်ပွဲများကို ယခုပြိုင်ပွဲအပါအဝင် (၄) ကြိမ်ကျင်းပသွားမည်ဖြစ်ကြောင်း သိရသည်။
