ကိုဗစ်-၁၉ ကြောင့် ဖြစ်ပေါ်လာနိုင်တဲ့ စီးပွားရေးသက်ရောက်မှုများအပေါ် ကုစားရေး လုပ်ငန်းကော်မတီမှ ထုတ်ချေးပေးထားသည့် ကိုဗစ်ချေးငွေများ ပြန်လည်ပေးဆပ်ရန် ကုမ္ပဏီထက်ဝက်ခန့်ကျန်ရှိနေသေးကြောင်း ရင်းနှီးမြှုပ်နှံမှုနှင့် နိုင်ငံခြား စီးပွားဆက်သွယ်ရေးဝန်ကြီးဌာနက ထုတ်ပြန်ထားသည်။
ပြည်သူ့ဘဏ္ဍာငွေများဖြစ်သည့် နိုင်ငံတော်၏ လှည့်ပတ်ရန်ပုံငွေ (Revolving Fund-RF) မှ ကျပ် (၅၀) ဘီလီယံနှင့် ပြည်ထောင်စု၏ ၂၀၁၉ -၂၀၂၀ ဘဏ္ဍာနှစ် အထွေထွေ ပိုလျှံရန်ပုံငွေ (General Reserve Fund-GRF)မှ ကျပ် (၁၅၀) ဘီလီယံ ၊စုစုပေါင်း ကိုဗစ်-၁၉ ရန်ပုံငွေ ကျပ် (၂၀၀) ဘီလီယံဖြင့် ကိုဗစ်-၁၉ ကပ်ရောဂါကြောင့် ထိခိုက်ခံစားခဲ့ရသည့် လုပ်ငန်းနယ်ပယ်များရှိ ကုမ္ပဏီ/လုပ်ငန်းများအား ၂၀၂၀ ပြည့်နှစ် ဧပြီလမှ စတင်ပြီး ချေးငွေသက်တမ်း (၁) နှစ် သတ်မှတ်၍ ချေးငွေများကို ခွင့်ပြုပေးထားခြင်းဖြစ်သည်။
ထို့ပြင် ချေးငွေသက်တမ်း (၁)နှစ်ပြည့်မြောက်ပြီးနောက်တွင်လည်း ၂၀၂၁ ခုနှစ် မတ်လ (၁၇) ရက်တွင် ပထမ အကြိမ် (၆)လ၊ ၂၀၂၁ ခုနှစ် စက်တင်ဘာ (၁၁) ရက်တွင် ဒုတိယအ ကြိမ်(၆) လ နှင့် ၂၀၂၂ ခုနှစ် နိုဝင်ဘာ (၄)ရက်တွင် တတိယအကြိမ် (၁) နှစ် သက်တမ်းတိုးခွင့်ပြုပေးခဲ့ပြီး စုစုပေါင်း သက်တမ်း (၃) နှစ် အထိ ခွင့်ပြုပေးထားခဲ့ပြီး ဖြစ်သည်။
ယခုအချိန်တွင် ချေးငွေခွင့်ပြုပေးခဲ့သည့် သက်တမ်း (၃) နှစ် ပြည့်မြောက် ကျော်လွန်ခဲ့ပြီး ဖြစ်ကာ အချို့လုပ်ငန်းများသည် ယနေ့တွင် (၃) နှစ်ကျော် (၄) နှစ်အတွင်းသို့ ရောက်ရှိနေပြီဖြစ်ကြောင်း သိရသည်။
ကော်မတီအနေဖြင့် ကိုဗစ်-၁၉ ရန်ပုံငွေမှ ခွင့်ပြုချေးငွေများကို မြန်မာနိုင်ငံကုန်သည်များ နှင့်စက်မှုလက်မှုလုပ်ငန်းရှင်များအသင်း၊ တိုင်းဒေသကြီး/ပြည်နယ် ကုန်သည်များနှင့် စက်မှုလက်မှုလုပ်ငန်းရှင်များအသင်းတို့၏ စိစစ်ထောက်ခံပေးမှုဖြင့် မြန်မာ့စီးပွားရေးဘဏ် နှင့် ပုဂ္ဂလိကဘဏ် (၆)ခု တို့မှတဆင့် ထုတ်ချေးပေးခဲ့ခြင်းဖြစ်သည်။
ထို့ကြောင့် ချေးငွေပြန်လည်ပေးဆပ်ရာတွင် မိမိတို့ ထုတ်ယူထားသည့် မြန်မာ့စီးပွားရေးဘဏ်အောက်ရှိ သက်ဆိုင်ရာဘဏ်ခွဲများ၊ ပုဂ္ဂလိက ဘဏ် (၆) ခု မှ တစ်ဆင့် ပြန်လည်ပေးဆပ်ရမည်ဖြစ်သည်။
ချေးငွေများကို ၂၀၂၀ ပြည့်နှစ် ဧပြီလမှ စတင်၍ ကုမ္ပဏီ/ လုပ်ငန်း စုစုပေါင်း ၅၉၉၀ ခု ထံသို့ ကျပ် ၁၅၈.၄၄၃၈ ဘီလီယံ ခွင့်ပြုထုတ်ချေးခဲ့ပြီး ကုမ္ပဏီ/လုပ်ငန်းများသို့ ချေးငွေခွင့်ပြု ပေးခဲ့သည့် သတ်မှတ်ကာလ ၃ နှစ် ကို ကျော်လွန်ခဲ့ပြီ ဖြစ်သော်လည်း စာရင်းများအရ ၂၀၂၄ ခုနှစ်၊ မေလကုန် အထိ အရင်းအကျေဆပ်သည့် ကုမ္ပဏီ/လုပ်ငန်း ၁၂၀၅ ခု သာရှိပြီး အရင်းအလီလီဆပ်သည့် ကုမ္ပဏီ/လုပ်ငန်း ၁၃၂၆ ခု နဲ့ အရင်းလုံးဝမဆပ်ရသေးသည့် ကုမ္ပဏီ/လုပ်ငန်း ၃၄၅၉ ခု ဖြစ်ကြောင်း သိရသည်။
အရင်း အလီလီဆပ်နှင့် လုံးဝမဆပ်ရသေးသော ကုမ္ပဏီ/လုပ်ငန်းများအနေဖြင့် သတ်မှတ် ကာလအတွင်း သက်ဆိုင်ရာဘဏ်များနှင့်ဆက်သွယ်၍ အလျင်အမြန်ပြန်လည်ပေးဆပ်ရန် တာဝန်ရှိကြောင်း ကော်မတီမှ အသိပေးပြောကြားထားသည်။
ချေးငွေ ကျပ် ၂၀၀ ဘီလီယံမှ ယနေ့အထိ ကျပ် ၇၅ ဘီလီယံသာ ပြန်လည်ကောက်ခံရရှိထားကြောင်း သိရသည်။
ထို့ကြောင့် ချေးငွေရယူထားသူများအနေဖြင့်ပြည်သူ့ဘဏ္ဍာငွေများကို အချိန်ကာလ တစ်ခုအထိ အကျိုးခံစားရပြီးဖြစ်သည့်အတွက် ချေးငွေပြန်လည်ပေးဆပ်ရန် သတ်မှတ်ထားသည့် အချိန်ကာလဖြစ်သည့် ၂၀ ၂၄ ခုနှစ် ဇူလိုင်လ (၁)ရက် မတိုင်မီ ချေးငွေများကို အမြန်ဆုံး ပြန်လည်ပေးဆပ်သွားရန်လည်း ကော်မတီမှ တိုက်တွန်း ပြောကြားထားသည်။