ဂျပန်ဝန်ကြီးချုပ် ဆနားအဲတာကအိချိသည် သောကြာနေ့က ပါလီမန်သို့ သူ၏ပထမဆုံး မူဝါဒရေးရာမိန့်ခွန်း ကို ပြောကြားရာ၌ ၂၀၂၆ ခုနှစ် မတ်လတွင် ကုန်ဆုံးမည့် လက်ရှိဘဏ္ဍာရေးနှစ်တွင် ဂျပန်နိုင်ငံ၏ ကာကွယ်ရေးဆိုင်ရာ အသုံးစရိတ်ကို ဂျီဒီပီ၏ ၂ ရာခိုင်နှုန်းနှင့် ညီမျှသော ပမာဏအထိ တိုးမြှင့်သွားမည့်အစီအစဉ်ကို ထုတ်ဖော်ပြောကြားခဲ့သကဲ့သို့ အခွန်အကောက်ကိုမတိုးဘဲ အောင်မြင်နိုင်သည်ဆိုသော စီးပွားရေးရည်မှန်းချက်များစာရင်းကိုလည်း သူကပြောကြားခဲ့သည်။
ရည်မှန်းချက်ပြည့်မီပါက ကာကွယ်ရေးအသုံးစရိတ်တိုးမြှင့်မှုသည် ၂၀၂၈ ခုနှစ်မတ်လအထိ ငါးနှစ်တာတိုးတက်မှုအဆုံးတွင် ၂ ရာခိုင်နှုန်းပစ်မှတ်အောင်မြင်ရန် လက်ရှိအစီအစဉ်ထက် ၂ နှစ်စော၍ ရောက်ရှိလာမည်ဖြစ်သည်။
အမေရိကန်သမ္မတ ဒေါ်နယ်ထရမ့်ပ်၏ ဖိအားပေးမှုအရ နေတိုးအဖွဲ့ဝင်နိုင်ငံများသည် ၂၀၂၅ ခုနှစ် ကာကွယ်ရေးအသုံးစရိတ်ကို ဂျီဒီပီ၏ ၂ ရာခိုင်နှုန်း ပြည့်မီရန် မျှော်မှန်းထားသောကြောင့် ယခုတိုးမြှင့်မှုသည် ဂျပန်နိုင်ငံကို အနောက်နိုင်ငံများနှင့် တန်းတူဖြစ်လာစေမည်ဖြစ်သည်။ နေတိုးအဖွဲ့သည် ထိုကဲ့သို့ အသုံးစရိတ်တိုးမြှင့်မှုကို ၂၀၃၅ အရောက်တွင် ဂျီဒီပီ၏ ၅ ရာခိုင်နှုန်းအထိ ရောက်ရှိရန် ကတိပြုထားသည်။ ဂျပန်နိုင်ငံ၏ လက်ရှိဘဏ္ဍာရေးနှစ်အတွက် ကနဦး ကာကွယ်ရေးဘတ်ဂျက်သည် ဂျီဒီပီ၏ ၁ ဒဿမ ၈ ရာခိုင်နှုန်းဖြစ်သည်။
အင်္ဂါနေ့တွင် လွှတ်တော်အမတ်များက ဝန်ကြီးချုပ်အဖြစ် ရွေးကောက်တင်မြှောက်လိုက်သည့် ဆနားအဲ တာကအိချိသည် လုံခြုံရေး မဟာဗျူဟာ၊ ကာကွယ်ရေးမဟာဗျူဟာနှင့် ကာကွယ်ရေးတည်ဆောက်မှုအစီအစဉ်တို့နှင့် သက်ဆိုင်သည့် နိုင်ငံတော်လုံခြုံရေးစာတမ်းသုံးခုကို ၂၀၂၆ ခုနှစ်ကုန်တွင် ဖြည့်စွက်မွမ်းမံသွားမည်ဟုလည်း မိန့်ခွန်းတွင် ပြောကြားခဲ့သည်။
Ref: ရက်ဒစ်