ကမ္ဘောဒီးယားကမြန်မာတွင်အစားအသောက်နှင့် ဘာသာရေး ခရီးသွားလုပ်ငန်းမြှင့်တင်

ဇွန်လ ၁၆ ရက်

ကမ္ဘောဒီးယားနိုင်ငံ ခရီးသွားလာရေးဝန်ကြီးဌာနနှင့် ရန်ကုန်မြို့ရှိ ကမ္ဘောဒီးယားသံရုံးတို့သည် မြန်မာခရီးသွားများကို ပိုမိုဆွဲဆောင်နိုင်ရန်အတွက် ကမ္ဘောဒီးယား၏ အစားအသောက်ဆိုင်ရာ သံတမန်ရေးရာနှင့် ဘာသာရေးခရီးသွားလုပ်ငန်းတို့ကို မြှင့်တင်မည့် နည်းလမ်းများကို ဆွေးနွေးခဲ့ကြသည်။ အဆိုပါဆွေးနွေးမှုကို ခရီးသွားလာရေးဝန်ကြီး ဟောက်ဟက် က မနေ့က ရန်ကုန်မြို့သို့ လာရောက်ခဲ့သည့် ခရီးစဉ်အတွင်း ပြုလုပ်ခဲ့ခြင်း ဖြစ်သည်။

ယင်းခရီးစဉ်အတွင်း ဝန်ကြီး မစ္စတာ ဟောက်ဟက်သည် ကမ္ဘောဒီးယားသံအမတ်ကြီး ချန်မာနစ်၊ သံရုံးဝန်ထမ်းများနှင့် ပြည်တွင်းရှိ ကမ္ဘောဒီးယားရင်းနှီးမြှုပ်နှံသူများ၏ ကိုယ်စားလှယ်များနှင့် တွေ့ဆုံခဲ့သည်။

ဝန်ကြီးက ပူးပေါင်းဆောင်ရွက်မှုများ တိုးမြှင့်ပေးခြင်းနှင့် ၎င်းရင်းနှီးမြှုပ်နှံသူများကို ပံ့ပိုးကူညီပေးခြင်းတို့အတွက် ကမ္ဘောဒီးယားတော်ဝင်အစိုးရ၏ ကျေးဇူးတင်ရှိမှုကို ကိုယ်စားလှယ်ဝန်ထမ်းများထံ ထပ်ဆင့်ပြောကြားခဲ့သည်။

တူညီသော ယဉ်ကျေးမှုတန်ဖိုးများနှင့် ဗုဒ္ဓဘာသာအပေါ် သက်ဝင်ယုံကြည်ကြသည့် ကမ္ဘောဒီးယားနှင့် မြန်မာ နှစ်နိုင်ငံအကြား ခိုင်မာသော ဆက်ဆံရေးကို အခြေခံ၍ ဝန်ကြီးက ဘာသာရေးခရီးသွားလုပ်ငန်း ဖွံ့ဖြိုးတိုးတက်စေရန်နှင့် အမျိုးသားရေးလက္ခဏာနှင့် ခရီးသွားဖလှယ်မှုများကို မြှင့်တင်ရန်အတွက် ရိုးရာအစားအသောက်များကို အဆင့်မြှင့်တင်မည့် အခွင့်အလမ်းများကို အလေးပေးပြောကြားခဲ့သည်။

မစ္စတာ ဟောက်ဟက်က အစားအသောက်၊ သံတမန်ရေးရာနှင့် ဘာသာရေးခရီးသွားလုပ်ငန်းများသည် ခရီးသွားများကို ဆွဲဆောင်နိုင်ပြီး ပြည်သူအချင်းချင်း ဆက်ဆံရေးကို ခိုင်မာစေမည့် အလားအလာကောင်းမွန်သော ထုတ်ကုန်များအဖြစ် ဖော်ပြခဲ့ပြီး သံရုံးအနေဖြင့် ယင်းလုပ်ငန်းများကို စျေးကွက်ပိုမိုချဲ့ထွင်ရန် တောင်းဆိုခဲ့သည်။ ထို့အပြင် နှစ်နိုင်ငံဆက်ဆံရေး တိုးတက်မှုနှင့် ကမ္ဘောဒီးယား၏ ဆွဲဆောင်မှုရှိသောနေရာများကို ဖော်ထုတ်ပြသပေးမှုအတွက် သံရုံးကို ကျေးဇူးတင်ရှိကြောင်း ပြောကြားခဲ့သည်။

ဝန်ကြီးက မြန်မာနိုင်ငံတစ်ဝန်းတွင် ကမ္ဘောဒီးယား၏ အမွေအနှစ်၊ ယဉ်ကျေးမှုနှင့် အစားအသောက်များကို ပိုမိုသိရှိနားလည်လာစေရန်အတွက် သံရုံးအနေဖြင့် အစိုးရနှင့် ပုဂ္ဂလိက ကဏ္ဍမှ ပူးပေါင်းဆောင်ရွက်သူများနှင့် ဆက်လက်လုပ်ဆောင်သွားရန် တိုက်တွန်းခဲ့သည်။

Ref: ခမာတိုင်းမ်စ်