တရုတ်အမျိုးသား ကမ်းလွန်ရေနံကော်ပိုရေးရှင်း (CNOOC) မှ ရင်းနှီးမြှုပ်နှံပြီး တည်ဆောက်ထားသော ကမ္ဘာ့ပထမဆုံး ကမ်းလွန် ရေနက်ပိုင်း ရေပေါ်လေအားလျှပ်စစ်ရဟတ်တာဘိုင်၏ ကိုယ်ထည်ပိုင်း တပ်ဆင်မှုပြီးစီးပြီဟု အင်္ဂါနေ့ထုတ် သိပ္ပံနှင့် နည်းပညာ နေ့စဉ်ထုတ် သတင်းစာတွင် ဖော်ပြထားသည်။
၎င်းသည် ရေအနက်မီတာ ၁၀၀ ကျော်နှင့် ကမ်းလွန်ပင်လယ်ပြင်အကွာအဝေး ကီလိုမီတာ ၁၀၀ ကျော်တွင် တည်ဆောက်တပ်ဆင်မည့် ကမ္ဘာ့ပထမဆုံးသော ကမ်းလွန်ရေနက်ပိုင်း လေအားလျှပ်စစ်စီမံကိန်းဖြစ်သလို တရုတ်နိုင်ငံ၏ ပထမဆုံးသော ရေနက်ပိုင်း ကမ်းလွန်လေအားလျှပ်စစ်စီမံကိန်းလည်းဖြစ်သည်။
အဆိုပါ လေအားလျှပ်စစ်ရဟတ်တာဘိုင်ကို တရုတ်နိုင်ငံ တောင်ပိုင်း ဟိုင်နန်ပြည်နယ်၊ ဝမ်ချမ်းမြို့မှ ၁၃၆ ကီလိုမီတာအကွာ ကမ်းလွန်ပင်လယ်ပြင်တွင် တပ်ဆင်မည်ဖြစ်ပြီး၊ လေပြင်းတိုက်ခတ်မှုနှင့် သမုဒ္ဒရာလှိုင်းလုံးကြီးများကလည်း တည်ဆောက်ရေးစီမံကိန်းအတွက် ကြီးမားသောစိန်ခေါ်မှုတစ်ရပ်ဖြစ်နေကြောင်းသိရသည်။
ယင်းစီမံကိန်းပြီးစီးပါက တာဘိုင်မှထုတ်လုပ်သည့် လျှပ်စစ်ဓာတ်အားသည် ရေနံနှင့်သဘာဝဓာတ်ငွေ့ထုတ်လုပ်သည့် ကမ်းလွန်ရေနံမြေအုပ်စု၏ ဓာတ်အားလိုင်းနှင့် ချိတ်ဆက်မည်ဖြစ်ပြီး နှစ်စဉ်ဓာတ်အား ကီလိုဝပ်နာရီ ၂၂ သန်းဖြင့် လျှပ်စစ်ဓာတ်အားထုတ်လုပ်နိုင်မည်ဖြစ်သည်။ နှစ်စဉ် လောင်စာဓာတ်ငွေ့ ကုဗမီတာ ၇.၇၃ သန်းကို ချွေတာပြီး နှစ်စဉ်ကာဗွန်ဒိုင်အောက်ဆိုဒ် ထုတ်လွှတ်မှုကို တန်ချိန် ၂၂၀၀၀ လျှော့ချပေးနိုင်မည်ဖြစ်ကြောင်း သိပ္ပံနှင့် နည်းပညာ နေ့စဉ်ထုတ် သတင်းစာက ဆိုထားသည်။