စီးပွားရေး ဈေးကွက် အခြေအနေကို တွက်ဆ၍ သူတစ်ပါး ထက် ခြေတစ်လှမ်း သာရန် ဆောင်ရွက်ကြ ရမည်ဟု နိုင်ငံတော် သမ္မတပြောကြား

စီးပွားရေး ဈေးကွက် အခြေအနေကို တွက်ဆ၍ သူတစ်ပါး ထက် ခြေတစ်လှမ်း သာရန် ဆောင်ရွက်ကြ ရမည်ဟု နိုင်ငံတော် သမ္မတပြောကြား
July 7, 2017 Asian Fame

4:49 pm
စီးပွားရေး ဈေးကွက် အခြေအနေကို တွက်ဆ၍ သူတစ်ပါး ထက် ခြေတစ်လှမ်း သာရန် ဆောင်ရွက်ကြ ရမည်ဟု နိုင်ငံတော် သမ္မတပြောကြား

president(နေပြည်တော်၊ ဇူလိုင် ၇)

ပြည်ထောင်စုသမ္မတ မြန်မာနိုင်ငံတော် အမျိုးသား စီမံကိန်းကော်မရှင် အစည်း အဝေးကို ယနေ့နံနက် ၁၀ နာရီတွင် နေပြည်တော် ရှိ နိုင်ငံတော်သမ္မတ အိမ်တော် အစည်းအဝေး ခန်းမ၌ ကျင်းပရာ အမျိုးသား စီမံကိန်းကော်မရှင် ဥက္ကဋ္ဌ နိုင်ငံတော် သမ္မတ ဦးထင်ကျော် တက်ရောက် အမှာစကားပြောကြားသည်။

အစည်းအဝေးသို့ အမျိုးသား စီမံကိန်းကော်မရှင် ဒုတိယဥက္ကဋ္ဌ များဖြစ်ကြသည့် နိုင်ငံတော်၏ အတိုင်ပင်ခံ ပုဂ္ဂိုလ် ဒေါ်အောင်ဆန်း စုကြည်၊ ဒုတိယ သမ္မတ ဦးမြင့်ဆွေနှင့် ဦးဟင်နရီဗန်ထီးယူ၊ ပြည်ထောင်စုဝန်ကြီးများ၊ ပြည်ထောင်စုရှေ့နေချုပ်၊ ပြည်ထောင်စု စာရင်းစစ်ချုပ်၊ ပြည်ထောင်စုရာထူးဝန် အဖွဲ့ဥက္ကဋ္ဌ၊ မြန်မာနိုင်ငံ ဗဟိုဘဏ်ဥက္ကဋ္ဌ၊ တိုင်းဒေသကြီးနှင့် ပြည်နယ် ၀န်ကြီးချုပ်များ၊ ကိုယ်ပိုင် အုပ်ချုပ်ခွင့် ရတိုင်းနှင့် ဒေသဦးစီး ဥက္ကဋ္ဌ များနှင့် တာဝန်ရှိသူများ တက်ရောက်ကြသည်။

ရှေးဦးစွာ နိုင်ငံတော် သမ္မတ က စီမံကိန်း ကော်မရှင်၏ ပထမအကြိမ် အစည်း အဝေးကို ၂၀၁၇ ခုနှစ် ဇန်န၀ါရီလ ၉ ရက်တွင် ကျင်းပခဲ့ ပါကြောင်း၊ အဆိုပါ အစည်း အဝေးသည် မိမိတို့ အစိုးရ ပထမဆုံးရေးဆွဲထားသည့် ၂၀၁၇-၂၀၁၈ ဘဏ္ဍာနှစ် အမျိုးသား စီမံကိန်း ဥပဒေ (မူကြမ်း)ကို ပြည်ထောင်စုလွှတ်တော်သို့ မတင်သွင်းမီ ကော်မရှင်တွင် ချပြညှိနှိုင်းပြီး အတည်ပြုချက်ရယူရန် ဆောင်ရွက်ခဲ့သည့်အစည်း အဝေး ဖြစ်ပါကြောင်း။

စီမံကိန်းရေးဆွဲရာ တွင် ပြည်သူများ၏ လတ်တလောလိုအပ်ချက်များနှင့် တိုင်းပြည် ရေရှည် ဖွံ့ဖြိုးတိုးတက်ရေးအတွက် လိုအပ်ချက် များကို နိုင်ငံတော် က ခွင့်ပြုပေး နိုင်သည့် ဘတ်ဂျက်ဘောင်နှင့်ပေါင်းစပ်၍ ချမှတ်ထားသည့် နိုင်ငံတော်စီးပွားရေး မူဝါဒများနှင့် အညီရေး ဆွဲခဲ့ခြင်း ဖြစ်ပါကြောင်း၊ ဒုတိယ အကြိမ် ပြည်ထောင်စုလွှတ် တော်၊ စတုတ္ထပုံမှန် အစည်းအဝေး (၁၅)ရက် မြောက်နေ့တွင် ၂၀၁၇-၂၀၁၈ ဘဏ္ဍာနှစ် အမျိုးသားစီမံကိန်း ဥပဒေကို နောက်ဆက်တွဲ များနှင့်အတူ အတည်ပြု ခဲ့ပြီးဖြစ်ပါကြောင်း၊

ယနေ့ ကျင်းပသည့် ဒုတိယအကြိမ်မြောက် အမျိုးသားစီမံကိန်းကော်မရှင် အစည်း အဝေး (၂/၂၀၁၇)ကို ပထမအချက် အနေဖြင့် ၂၀၁၆-၂၀၁၇ ဘဏ္ဍာနှစ် အမျိုးသား စီမံကိန်း အကောင်အထည် ဖော်ဆောင်ရွက်ရာတွင် တွေ့ကြုံခဲ့ရသည့် အားသာချက်နှင့် အားနည်းချက် များကို စိစစ်လေ့လာ သုံးသပ်ရန်ဖြစ်ပါကြောင်း ၊မြန်မာနိုင်ငံ၏ စီးပွားရေး ကို နိုင်ငံတကာ အဖွဲ့အစည်းများဖြစ်ကြသည့် ကမ္ဘာ့ဘဏ် (WB)က (၆ ဒဿမ ၅ ရာခိုင်နှုန်း)၊ အာရှ ဖွံ့ဖြိုးရေးဘဏ် (ADB) က (၆ဒဿမ၄ရာခိုင်နှုန်း)၊ အပြည်ပြည် ဆိုင်ရာ ငွေကြေး ရန်ပုံငွေ အဖွဲ့ (IMF) က (၆ ဒဿမ ၃ ရာခိုင်နှုန်း ) နှင့် AMRO အဖွဲ့က (၆ ရာခိုင်နှုန်း ) တိုးတက်မည်ဟု ခန့်မှန်းကြပါကြောင်း၊

ဒုတိယအချက်မှာ ပြည်ထောင်စု လွှတ်တော်က ပြဌာန်း အတည်ပြုပေးခဲ့သည့် ၂၀၁၇-၂၀၁၈ ဘဏ္ဍာနှစ် အမျိုးသားစီမံကိန်း ကို ပြည်ထောင်စု၊ တိုင်းဒေသကြီးနှင့် ပြည်နယ်များက အချိန်နှင့် တပြေးညီ ထိရောက်စွာ အကောင်အထည်ဖော်နိုင်ရေး အတွက် လုပ်ငန်းစီမံချက် များကို ဖော်ထုတ်ညှိနှိုင်းပေါင်း စပ်ဆောင်ရွက် ကြရန် ဖြစ်ပါကြောင်း၊ တတိယ အချက်မှာ လာမည့် ၂၀၁၈-၂၀၁၉ ဘဏ္ဍာနှစ် အမျိုးသား စီမံကိန်းရေးဆွဲသည့်အခါ နိုင်ငံတော်နှင့် နိုင်ငံသား တို့၏ အကျိုး စီးပွားနှင့် နိုင်ငံတော်က ချမှတ်ထားသည့် စီးပွားရေး မူဝါဒများကို ချိတ်ဆက်ပေါင်းစပ် ဆောင်ရွက်နိုင်ရန်ဖြစ်ပါကြောင်း။

နိုင်ငံတော်၏ စီးပွားရေး မူဝါဒ မျှော်မှန်းချက်၊ ရည်မှန်းချက်များနှင့် မူဝါဒ တစ်ရပ် ခြင်းအလိုက် အကောင်အထည် ဖော်ဆောင်ရွက်ရမည့် အကြောင်းအရာ များကို ချမှတ်ပြီးဖြစ်ပါကြောင်း၊ နှစ်စဉ်စီမံကိန်းများ အတွက် ဦးစားပေး အစီအစဉ်များ၊ ဦးစားပေး လုပ်ငန်းများနှင့် အကောင်အထည် ဖော်ဆောင်ရွက်ကြမည့် လုပ်နည်း စနစ်များကို ညှိနှိုင်းဖော်ထုတ်ချမှတ်ရန် လိုအပ်နေသေးသည် ကို တွေ့ရှိ ရပါကြောင်း၊ အမျိုးသား စီမံကိန်းရေးဆွဲ ဆောင်ရွက်သည့်အခါ တိုင်းရင်းသားစည်းလုံး ညီညွတ်ရေး၊ တရားဥပဒေ စိုးမိုးရေးနှင့် တည်ငြိမ် အေးချမ်းရေး၊ လူသားအရင်းအမြစ်ဖွံ့ဖြိုးရေးနှင့် သဘာဝပတ်ဝန်း ကျင် ထိန်းသိမ်း စောင့်ရှောက်ရေး လုပ်ငန်းရပ်များကိုပါ ထည့်သွင်း ရေးဆွဲရမည် ဖြစ်ပါကြောင်း၊ ထို့ပြင် အမျိုးသား စီမံကိန်းတွင် ထည့်သွင်းမည့် လုပ်ငန်း စီမံကိန်းများ (Projects)နှင့် လုပ်ငန်း များ (Works) သည် ဖြစ်မြောက်နိုင်စွမ်း ရှိ/မရှိ၊ စီပွားရေး အရ တွက်ခြေကိုက်မှု ရှိ/မရှိ၊ ပြည်သူ များအတွက် အကျိုး ရှိ/မရှိ၊ ဒေသ ဖွံ့ဖြိုးရေးကို အထောက်အကူပြု/ မပြု၊ ပတ်ဝန်းကျင် ထိခိုက်မှု ရှိ/မရှိ စသည်တို့ကို ဘက်စုံလေ့လာ ဆန်းစစ်ရန် လိုအပ်ပါကြောင်း၊ ဒုတိယ အကြိမ်ပြည်ထောင်စု လွှတ်တော်၊ စတုတ္ထပုံမှန် အစည်း အဝေးတွင် လွှတ်တော်ကိုယ်စားလှယ်များ၏ ဆွေးနွေးအကြံပြု တင်ပြ ချက် များကို ၂၀၁၈-၂၀၁၉ ဘဏ္ဍာနှစ် အမျိုးသား စီမံကိန်းရေးဆွဲရာတွင် အလေးထား သုံးသပ်ဆောင်ရွက်ရမည် ဖြစ်ပါကြောင်း၊

၂၀၁၇-၂၀၁၈ ဘဏ္ဍာနှစ် အမျိုးသား စီမံကိန်းကို ယခင်နှစ် စီမံကိန်း အကောင် အထည်ဖော်စဉ်ခဲ့စဉ် က တွေ့ကြုံခဲ့ရသည့် အားသာချက် များကို ဆက်လက် ထိန်းသိမ်းပြီး ဖြစ်ပေါ်ခဲ့သည့် အားနည်းချက်များကို စိစစ်သုံးသပ်ပြုပြင်ဆောင် ရွက်ကြရ မည်ဖြစ်ပါ ကြောင်း၊ အလားတူ ၂၀၁၈-၂၀၁၉ ဘဏ္ဍာနှစ် မှ ၂၀၂၀-၂၀၂၁ ဘဏ္ဍာနှစ် အထိ နှစ်အလိုက် စီမံကိန်းများအတွက် လိုအပ် သည့် ဦးစားပေး အစီအစဉ်များ၊ လုပ်ငန်းရပ် များနှင့် လုပ်နည်းစနစ်များချမှတ်နိုင်ရေးအတွက် အလေးထားဆွေးနွေးဖော်ထုတ်ပေး ကြရန် တိုက်တွန်းလိုပါကြောင်း ပြောကြားသည်။

ထို့နောက် အမျိုးသား စီမံကိန်းကော်မရှင် အတွင်းရေးမှူး စီမံကိန်းနှင့် ဘဏ္ဍာရေး ၀န်ကြီးဌာန၊ ပြည်ထောင်စုဝန်ကြီး ဦးကျော်ဝင်း က အမျိုးသား စီမံကိန်းများ ရေးဆွဲခြင်း၊ အကောင်အထည်ဖော်ခြင်း၊ ကြီးကြပ်ခြင်းများနှင့် ပတ်သက်၍ ဆောင်ရွက်ထားရှိမှု အခြေအနေ များကို ရှင်းလင်းတင်ပြသည်။

ယင်းနောက် ပြည်ထောင်စုဝန်ကြီး ဦးဝင်းခိုင်၊ ဦးသန့်စင်မောင်၊ ဒေါက်တာ သန်းမြင့်၊ ရန်ကုန်တိုင်းဒေသကြီး ၀န်ကြီးချုပ် ဦးဖြိုးမင်းသိန်းနှင့် မန္တလေး တိုင်းဒေသ ကြီးဝန်ကြီးချုပ် ဒေါက်တာဇော်မြင့်မောင်တို့ က လျှပ်စစ်ကဏ္ဍ၊ အထူးစီးပွားရေးဇုန် ကဏ္ဍ၊ ပို့ကုန်သွင်း ကုန်ကဏ္ဍနှင့် ပို့ဆောင်ရေးကဏ္ဍများနှင့် စပ်လျဉ်း၍ဆွေးနွေး ကြသည်။

ထို့နောက် အမျိုးသားစီမံကိန်းကော်မရှင် ဒုတိယဥက္ကဋ္ဌ နိုင်ငံတော်၏ အတိုင်ပင်ခံ ပုဂ္ဂိုလ်က ပြည်ထောင်စုအစိုးရနှင့် တိုင်းဒေသ ကြီးနှင့် ပြည်နယ်အစိုးရအဖွဲ့ များသည် ချိတ်ဆက်မှုများ ခိုင်မာစွာဆောင်ရွက်ကြရမည် ဖြစ်ပါကြောင်း၊ တရားဥပဒေ စိုးမိုးရန် အစိုးရ အဖွဲ့သာမက ပြည်သူများ ၀ိုင်းဝန်း ပူးပေါင်းပါဝင်နိုင်ရန် ဆောင်ရွက်ကြ ရမည်ဖြစ်ကြောင်း၊ နိုင်ငံ၏စီးပွားရေးတိုးတက်မှုကို ခန့်မှန်း ထားသည်ထက် ပိုမို တိုးတက်ရန် ဆောင်ရွက်ကြရမည်ဖြစ်ကြောင်း၊ စီးပွားရေး ဈေးကွက်နှင့် ပတ်သက်၍ လက်ရှိဈေးကွက် များအပြင် အခြားဈေးကွက်များကိုလည်း မိမိတို့တီထွင်ဖန်တီးနိုင်သည့် စွမ်းအားများဖြင့် ဖော်ဆောင်ကြရမည် ဖြစ်ကြောင်း၊ စီးပွားရေးဈေး ကွက် အခြေ အနေ မည်သို့ဖြစ်နေသည် နောင်တွင် မည်သို့ဖြစ်နိုင်သည် တို့ကို ကြိုတင်တွက်ဆ၍ သူတစ်ပါး ထက် ခြေတစ်လှမ်း သာ ရန် ဆောင်ရွက်ကြ ရမည်ဖြစ်ကြောင်း၊ ပြည်နယ်အစိုးရနှင့် တိုင်းဒေသကြီးနှင့် ပြည်နယ်အစိုးရများ အချိတ်အဆက် မိမိ ဆောင် ရွက်ရေး သည် လွန်စွာအရေးကြီးပါကြောင်း၊ ဖက်ဒရယ် ဒီမိုကရေစီပြည်ထောင်စုစနစ်တွင် တိုင်းဒေသ ကြီးနှင့် ပြည်နယ် များ၏ တာဝန်များ၊ ၀တ္တရား များနှင့် လုပ်ပိုင်ခွင့်များ မည်သို့ရှိမည်ကို ထည့်သွင်းစဉ်းစားပြီး အမျိုးသား စီမံကိန်းကို ချဉ်းကပ်ရ မည် ဖြစ်ကြောင်း၊ ရပိုင်ခွင့်များ၊ လုပ်ပိုင်ခွင့် များနှင့်အတူ တာဝန်နှင့် ၀တ္တရားများ ပါလာမည်ဖြစ်ကြောင်း၊ တာဝန်ယူမှု၊ တာဝန်သိမှုနှင့် တာဝန်ခံမှုတို့သည် များစွာ အရေးကြီးပါကြောင်း၊ စိန်ခေါ်မှုဆိုသည်မှာ အမြဲရှိနေမည်ဖြစ်ကြောင်း၊ တိုင်းဒေသကြီးနှင့် ပြည်နယ်အစိုးရများ၏ စီမံကိန်းများနှင့် ပတ်သက်၍ စိန်ခေါ်မှု များနှင့် ရင်ဆိုင်ရမည့်ပြဿနာရပ်များကို ဖြေရှင်းနိုင်ရန် အဘက်ဘက်မှ အားထုတ် ကြိုးပမ်း ဆောင်ရွက် သွားကြ ရမည်ဖြစ်ကြောင်း ပြောကြား သည်။

ယင်းနောက် အမျိုးသားစီမံကိန်းကော်မရှင်ဥက္ကဋ္ဌ နိုင်ငံတော်သမ္မတ ဦးထင်ကျော် က စီမံကိန်းများ ဆောင်ရွက်ရာတွင် ပြည်ထောင်စု၊ တိုင်းဒေသကြီးနှင့် ပြည်နယ် အစိုးရအဖွဲ့ဟူ၍ မခွဲခြားဘဲ၊ ကွင်းဆက်မပြတ်စေဘဲ လိုအပ်ချက်များကို အပြန်အလှန် ဆွေးနွေး ညှိနှိုင်းချိတ်ဆက် အဖြေ ရှာဆောင်ရွက်ကြရမည် ဖြစ်ကြောင်း၊ ထိုသို့ ဆောင်ရွက်ရာတွင် သတ်မှတ်ထားသည့် မူဘောင်များကို မကျော်လွန်စေရေး သည် အရေးကြီးပါကြောင်း၊ အချိတ်အဆက်ရှိရှိဖြင့် အချိုးညီညီ ဖွံ့ဖြိုးတိုးတက်အောင် ၀ိုင်းဝန်းပူးပေါင်းဆောင် ရွက်ကြရမည် ဖြစ်ပါကြောင်း။

ဖွံ့ဖြိုးရေးစီမံကိန်းလုပ်ငန်းများ ရေးဆွဲရာတွင် နိုင်ငံတော်မှ ချမှတ်ထားသည့် စီးပွားရေး မူဝါဒများနှင့် လိုက်လျောညီထွေ အကောင်အထည်ဖော်နိုင်မည့် စဉ်ဆက် မပြတ်ဖွံ့ဖြိုးမှု ပန်းတိုင်များ၏ ရည်မှန်းချက်များကို ပေါင်းစပ်ထည့်သွင်းရေးဆွဲ ကြရမည်ဖြစ်ကြောင်း၊ စီမံကိန်းလုပ်ငန်းများ အောင်မြင်ရန် တစိုက်မတ်မတ် ကြီးကြပ် ဆောင်ရွက်သွားကြရ မည်ဖြစ်ကြောင်း၊ ဦးစားပေးလုပ်ငန်းများကို ရွေးချယ်ဆောင်ရွက် နိုင်ရေးသည် အထူးအရေးကြီးပါကြောင်း၊ မိမိတို့ဆောင်ရွက်သည့်လုပ်ငန်းများသည် အမှန်တကယ် အကျိုးပြုမည်၊ စီးပွားရေး တွက်ခြေကိုက်မည်၊ တိုင်းပြည် အတွက်မည်မျှ အကျိုးပြုနိုင်မည် စသည်တို့ကို စဉ်းစား ဆောင်ရွက်နိုင်ရေးသည် အရေးကြီးပါကြောင်း၊ နိုင်ငံတော်၏ မျှော်မှန်းချက် အတိုင်းရေရှည် တည်တံ့ခိုင်မြဲသည့် စီးပွားရေးပုံ သဏ္ဍာန် အသွင်ကူးပြောင်းမှုနှင့် ကဏ္ဍအလိုက်၊ ဒေသအလိုက်အချိုးကျ မျှတစွာ ဘက်စုံဖွံ့ဖြိုး တိုးတက်ရန် ကြိုးပမ်းဆောင်ရွက်ကြပါဟု တိုက်တွန်းလိုပါကြောင်း ပြောကြားသည်။

နိုင်ငံတော်သမ္မတရုံး

Comments (0)

Leave a reply

Your email address will not be published. Required fields are marked *

*