ပြည်သူ့ဘဏ္ဍာအလွဲသုံးမှု၊ အသုံးလွဲမှုများနှင့် အားနည်းနေသော အပြန်အလှန်ထိန်းကျောင်းမှု (အယ်ဒီတာ့အာဘော်)

ပြည်သူ့ဘဏ္ဍာအလွဲသုံးမှု၊ အသုံးလွဲမှုများနှင့် အားနည်းနေသော အပြန်အလှန်ထိန်းကျောင်းမှု (အယ်ဒီတာ့အာဘော်)
May 3, 2017 Asian Fame

2:54 pm
ပြည်သူ့ဘဏ္ဍာအလွဲသုံးမှု၊ အသုံးလွဲမှုများနှင့် အားနည်းနေသော အပြန်အလှန်ထိန်းကျောင်းမှု (အယ်ဒီတာ့အာဘော်)

ယခုရက်သတ္တပတ်အတွင်း ၇ ဘီလျံ၊ ဘီလျံ ၇ဝ၊ အစရှိသဖြင့် ပြည်သူပိုင် ငွေကြေးများကို အုပ်ချုပ်ရေးအာဏာပိုင်များက အလွဲသုံးမှုများ ရှိနေကြောင်း၊ ထိုသို့ အလွဲသုံးမှုများကြောင့် ပြည်သူပိုင်ငွေကြေး အများအပြား ဆုံးရှုံးနေရကြောင်း ဖြစ်ပေါ်နေသောသတင်းများ အရ သိရှိရပါသည်။ တာဝန်သိသူတို့၏ ဖော်ထုတ် တိုင်ကြားမှုများကြောင့် အချို့သော အလွဲသုံးမှုများပေါ်ပေါက်ခဲ့သော်လည်း နိုင်ငံ နှင့်အဝှမ်းတွင် ထိုထက်ပိုသော အလွဲသုံးမှုများ ရှိနိုင်သေးကြောင်း ခန့်မှန်းနိုင် ပါသည်။

အုပ်ချုပ်ရေးအာဏာပိုင်တို့သည် ပြည်သူ့ငွေကြေးများကို ချမှတ်ထားသော ဘဏ္ဍာရေးဆိုင်ရာ သတ်မှတ်ချက်များ၊ လုပ်ထုံးလုပ်နည်းများနှင့်အညီ စနစ်တကျ သုံးစွဲရန် တာဝန်ရှိပါသည်။ ကိုယ်ကျိုးအတွက်သော်လည်းကောင်း၊ မိမိကိုယ်စား ပြုသော အဖွဲ့အစည်း၊ မြို့၊ ရပ်ရွာအကျိုးအတွက်သော်လည်းကောင်း အဂတိတရား တစ်ပါးပါးကို လိုက်စား၍ အလွဲသုံးမှုများ မပြုလုပ်သင့်သလို ငွေကြေးဆိုင်ရာ စည်းမျဉ်းစည်းကမ်းများနှင့် မကိုက်ညီသည့် အသုံးလွဲမှုများလည်းမဖြစ်သင့်ပါ။

ထိုသို့ အလွဲသုံးမှုများ၊ အသုံးလွဲမှုများကို အုပ်ချုပ်ရေးအာဏာပိုင်များ ဆောင်ရွက်ခြင်း မပြုနိုင်အောင် အုပ်ချုပ်ရေးနည်းလမ်းဖြင့် အပြန်အလှန်ထိန်း ကျောင်းရန်လိုအပ်ပါသည်။ ထိုသို့ ထိန်းကျောင်းရန် တာဝန်အရှိဆုံးအဖွဲ့အစည်းမှာ ပြည်ထောင်စု စာရင်းစစ်ချုပ်ရုံးဖြစ်ပါသည်။ ပြည်ထောင်စုစာရင်းစစ်ချုပ်ရုံးနှင့် အဆင့်ဆင့်သော ပြည်နယ်၊ တိုင်းဒေသကြီး၊ မြို့နယ် စာရင်းစစ်ရုံးများသည် အုပ်ချုပ်ရေးအာဏာပိုင်များက ပြည်သူ့ငွေကြေးရယူ သုံးစွဲမှုများတွင် စနစ်တကျရှိ ရေးနှင့် အလေအလွင့်မရှိစေရေး ကြပ်မတ်ထိန်းကျောင်းရန် တာဝန်ရှိပါသည်။

ဖွဲ့စည်းပုံအခြေခံဥပဒေပုဒ်မ ၂၂၉ (က) အရ နိုင်ငံတော်သမ္မတ ဥက္ကဋ္ဌအဖြစ် ဦးဆောင်သော ဘဏ္ဍာရေးကော်မရှင်တွင် ပြည်နယ်၊ တိုင်းဒေသကြီးဝန်ကြီးချုပ်များသည် အဖွဲ့ဝင်အဖြစ်ပါဝင်သည်။ ထိုသို့ နိုင်ငံတော်အဆင့် ဘဏ္ဍာရေးကော်မ ရှင်တွင် ပါဝင်သူများက အလွဲသုံးမှု၊ အသုံးလွဲမှုများတွင်ပါဝင်ပတ်သက်နေသည်မှာ မဖြစ်သင့်သောကိစ္စမျိုးဖြစ်သည်။

အလားတူပင် ဖွဲ့စည်းပုံအခြေခံဥပဒေပုဒ်မ ၂၄၂ (က) အရ နိုင်ငံတော်၏ အရ အသုံးစာရင်းများကိုစစ်ဆေး၍ ပြည်ထောင်စုလွှတ်တော်သို့ တင်ပြနိုင်ရန် ပြည်ထောင်စုစာရင်းစစ်ချုပ်ကို ခန့်အပ်တာဝန်ပေးထားပြီးဖြစ်ရာ ပြည်ထောင်စု စာရင်းစစ်ချုပ်သည် ပြည်ထောင်စု စာရင်းစစ်ချုပ်ဥပဒေနှင့်အညီ နိုင်ငံတော်၏ အရအသုံးစာရင်းများကို တိကျသေချာစွာစိစစ်ပေးရန် အထူးလိုအပ်လှပါသည်။ သို့မှသာ ပြည်သူ့ဘဏ္ဍာငွေများကို လုပ်ပိုင်ခွင့်ရှိသူတို့က အလွဲသုံးမှု၊ အဂတိ လိုက်စားသုံးစွဲမှုနှင့် အခြားအလေအလွင့်များမှ ကာကွယ်နိုင်မည်ဖြစ်ပါသည်။

ပြည်သူ့ငွေများကိုင်တွယ်သုံးစွဲနေကြသည်မှာ အစိုးရတာဝန်ရှိသူများသာမက၊ ပုဂ္ဂလိကဘဏ်များ၊ အာမခံလုပ်ငန်းများ၊ အများပိုင်ကုမ္ပဏီများစသော အဖွဲ့ အစည်းများလည်း များစွာရှိနေသေးရာ အားနည်းချက်မရှိအောင်စိစစ်ရသည်မှာ လွယ်ကူလှသည်မဟုတ်ပေ။ တိကျမှု၊ မှန်ကန်မှုနှင့် မြန်ဆန်မှုရှိစေရန်အတွက် ခေတ်မီနည်းစနစ်များကို အသုံးပြုရန်နှင့် နိုင်ငံတကာနှင့် အစိုးရအသိအမှတ်ပြု ပုဂ္ဂလိက စာရင်းစစ်များ၏ကဏ္ဍ ဖွံ့ဖြိုးလာစေရန် အလေးပေးဆောင်ရွက်ရန် အထူး လိုအပ်လျက်ရှိပါသည်။ တစ်ချိန်တည်းမှာပင် စာရင်းစစ်များကိုယ်တိုင်အဂတိလိုက်စားမှု လျော့နည်း ကင်းစင်ရေး၊ အချို့သောဌာနများကိုစစ်ဆေးရာတွင် ဆရာ၏စာရင်းကို တပည့်က စစ်နေရသည့် အခြေအနေမျိုးမှကင်းလွတ်ရေးတို့အတွက် ဥပဒေဆိုင်ရာ လိုအပ် ချက်များရှိပါက ဖြည့်စွက်ပြင်ဆင်ခြင်း တို့ကို အချိန်နှင့်တစ်ပြေးညီ ဆောင်ရွက်ရန် လိုအပ်ပါသည်။ အချုပ်အားဖြင့်ဆိုရသော် ပြည်သူ့ငွေကြေးကိုအလွဲသုံးမှုများဖြစ်ပေါ်ခြင်းသည် မည်သည့်အစိုးရလက်ထက်တွင် ဖြစ်စေ အစိုးရအပေါ်ပြည်သူလူထု၏ ယုံကြည်မှုလျော့နည်း ကျဆင်းစေပါသည်။ ပြည်သူ့အစိုးရလက်ထက်တွင် ထိုသို့ မဖြစ်စေလိုတော့ပါ။
အထူးကြပ်မတ်ထိန်းသိမ်းသင့်သည့် အချိန်အခါမျိုး ဖြစ်ပါကြောင်း ရေးသားတင်ပြအပ်ပါသည်။

အယ်ဒီတာ

Comments (0)

Leave a reply

Your email address will not be published. Required fields are marked *

*