အစိုးရနှင့် ILO ကြား နားလည်မှုစာချွန်လွှာ ရေးထိုးပြီးနောက် အဓမ္မစေခိုင်းမှု သုံးရာကျော်ဖြေရှင်းနိုင်ခဲ့

အစိုးရနှင့် ILO ကြား နားလည်မှုစာချွန်လွှာ ရေးထိုးပြီးနောက် အဓမ္မစေခိုင်းမှု သုံးရာကျော်ဖြေရှင်းနိုင်ခဲ့
March 30, 2017 Asian Fame

11:14 am
အစိုးရနှင့် ILO ကြား နားလည်မှုစာချွန်လွှာ ရေးထိုးပြီးနောက် အဓမ္မစေခိုင်းမှု သုံးရာကျော်ဖြေရှင်းနိုင်ခဲ့

ရဲလွင်
ရန်ကုန်၊ မတ် ၂၇

မြန်မာအစိုးရနှင့် ILO တို့အကြား အဓမ္မခိုင်းစေမှုပပျောက် ရေးနားလည်မှု စာချွန်လွှာချုပ်ဆို ပြီးနောက်ပိုင်းမှ ယခုနှစ် မတ်လအထိ အဓမ္မစေခိုင်းမှု ၃၅၆ မှုကို ဖြေရှင်းဆောင်ရွက်ပေးခဲ့ကြောင်း အလုပ်သမား၊ လူဝင်မှုကြီးကြပ် ရေးနှင့် ပြည်သူ့အင်အားဝန်ကြီးဌာနမှ သိရသည်။

ILO ပြဋ္ဌာန်းချက် (Convention) ၂၉ အရ မြန်မာအစိုးရ နှင့် အပြည်ပြည်ဆိုင်ရာ အလုပ်သမားအဖွဲ့အစည်း ILO တို့အကြား အဓမ္မခိုင်းစေမှုပပျောက် ရေး နားလည်မှုစာချွန်လွှာကို လက်မှတ်ရေးထိုးပြီးနောက်ပိုင်း ၂ဝ၁၇ ခုနှစ်မတ်လအထိ အသက် မပြည့်ဘဲ စုဆောင်းမှု၊ အသက်မပြည့်ဘဲ အဓမ္မစုဆောင်းမှု၊ အရပ်ဘက် အဓမ္မခိုင်းစေမှု၊ တပ်ဘက်အဓမ္မခိုင်းစေမှု စုစုပေါင်း ၈၉၈ မှုရှိခဲ့ပြီး ယင်းထဲမှ ၃၅၆ မှုကို ဖြေရှင်းကာ အမှုပိတ်သိမ်း နိုင်ခဲ့ကြောင်း အလုပ်သမား၊ လူဝင်မှုကြီးကြပ်ရေးနှင့် ပြည်သူ့ အင်အားဝန်ကြီးဌာနမှ တာဝန်ရှိသူက ပြောသည်။

”အသက် မပြည့်သေးဘဲနဲ့ တပ်မတော်သားလုပ်တာ။ တချို့ ကျတော့ အတင်းအကျပ် တာဝန်ထမ်းဆောင် ခိုင်းခံရတာတွေရှိတယ်။ အခု ကိန်းဂဏန်းကတော့ အရပ်ဘက်ရော၊ တပ်ဘက်ရော ရောနေတာပါ။ ပိတ်ပြီးသွားပြီ ဆိုတာက ဖြေရှင်းပြီးတဲ့ အမှုကို ပြောတာ။ မပြီးပြတ်သေးတဲ့ အမှုကတော့ ILO ရဲ့အတည်ပြုချက် မရသေးတဲ့အမှုတွေဖြစ်ပါတယ်။ ဒီဘက်က ဖြေရှင်းပြီးသွားတာကို ILO ကနေဟုတ်ပါတယ်၊ အဆင်ပြေသွားပါပြီဆိုတာမျိုး အတည်ပြုတာကိုပြောတာပါ” ဟု အဆိုပါ တာဝန်ရှိသူကဆိုသည်။

ဖြေရှင်းရန် ကျန်ရှိသောအမှု များထဲမှ ၃၅၇ မှုကို ဆက်လက် ဖြေရှင်းနေဆဲဖြစ်ပြီး ယင်းထဲတွင် ၁၈၅ မှုမှာ ILO ၏ အတည်ပြုချက်ကို စောင့်ဆိုင်းနေဆဲဖြစ် ကြောင်း ဝန်ကြီးဌာနမှ သိရသည်။ မြန်မာနိုင်ငံသည် အပြည် ပြည်ဆိုင်ရာ အလုပ်သမားအဖွဲ့၏ လူ့အခွင့်အရေးနှင့် ဆက်နွှယ်သည့် ပြဋ္ဌာန်းချက် (၈) ခု အနက် တစ်ခုအပါအဝင်ဖြစ်သည့် အဓမ္မ ခိုင်းစေမှုဆိုင်ရာ ပြဋ္ဌာန်းချက် အမှတ်-၂၉ (၁၉၃ဝ)ကို ၁၉၅၅ ခုနှစ်တွင် စတင်လက်ခံကျင့်သုံးခဲ့ ခြင်းဖြစ်ပြီး နောက်ဆက်တွဲစာချုပ် ကို အတည်ပြုရန် ၂ဝ၁၆ ခုနှစ် သြဂုတ်လတွင် ကျင်းပသော ဒုတိယအကြိမ် ပြည်ထောင်စု လွှတ်တော် ဒုတိယပုံမှန်အစည်းအဝေးတွင် တင်သွင်းပြီးနောက် အတည်ပြုခဲ့ခြင်းဖြစ်သည်။

Comments (0)

Leave a reply

Your email address will not be published. Required fields are marked *

*