အသစ်​တစ်ယောက်​အနေနဲ့ စိန်ခေါ်မှုများတဲ့ ဇာတ်ကားအကြောင်း ခါရာ ပြောပြ

အသစ်​တစ်ယောက်​အနေနဲ့ စိန်ခေါ်မှုများတဲ့ ဇာတ်ကားအကြောင်း ခါရာ ပြောပြ
February 19, 2019 Asian Fame
အသစ်​တစ်ယောက်​အနေနဲ့ စိန်ခေါ်မှုများတဲ့ ဇာတ်ကားအကြောင်း ခါရာ ပြောပြ

 

အနုပညာလောကကို အသစ်​တစ်ယောက်​ဖြစ်ပေမယ့်​ ခြေလှမ်းခပ်စိတ်စိတ်နဲ့ ထိုးဖောက်​ဝင်ရောက်လာတဲ့ အနုပညာရှင်​ကတော့ခါရာပါ။ ဇာတ်လမ်းတွဲတွေ၊ Dimensions (မျက်နှာပြင်များ) ရုပ်ရှင်​ဇာတ်ကားကြီးနဲ့ ပရိသတ်တွေ သတိထားမိလာပြီး အားပေးလာကြပါတယ်။ သူ့ရဲ့ နောက်ထပ်​အနုပညာပညာကြိုးစားမှု တစ်ခုဖြစ်တဲ့ မြို့ပြမုဆိုးများ ရုပ်ရှင်​ဇာတ်ကားကြီးကလည်း မကြာခင်မှာ ရုံတင်​ပြသတော့မှာ ဖြစ်ပါတယ်။ မြို့ပြ မုဆိုးများ ရုပ်ရှင်​ဇာတ်ကားကြီးထဲက ကာရိုက်တာနဲ့ ပတ်သက်​ပြီး ခါရာက ”ဒီကားထဲမှာဆိုရင် ကျွန်တော်က ဆိုင်းလုံဆိုတဲ့ သွေးအေးအေးနဲ့ ရက်စက်တတ်တဲ့ ဂန်းစတားတစ်ယောက်လို သရုပ်ဆောင်ထားတယ်။ ကျွန်တော့်အတွက် စိန်ခေါ်မှုများတဲ့ ကာရိုက်တာတစ်ခု။ ဒီဇာတ်လမ်းက ရိုက်ကူးထားတာ နှစ်နှစ်လောက်ရှိပြီ။ ကျွန်တော်လုပ်ဖူးတဲ့ ဇာတ်ကောင်တွေထဲမှာ ဆိုင်းလုံဆိုတဲ့ ဇာတ်ကောင်ကို တော်တော်အားရတယ်။ ဒီဇာတ်ကားရိုက်ကူးဖို့ကို ကျွန်တော်​သုံးလလောက်အချိန်ယူပြီး ကြိုတင်ပြင်ဆင်ထားတယ်။ အများကြီးလည်း ကြိုးစားထားပါတယ်”လို့ ပြောပြပါတယ်။ မြို့ပြမုဆိုးများ ရုပ်ရှင်​ဇာတ်ကားကြီးက အသစ်တွေကြီးပဲ ပူးပေါင်းပြီး ဖန်တီးထားတယ်​ဆိုတာကိုလည်း ”ဒီရုပ်ရှင်​ဇာတ်ကားထဲမှာ ဒါရိုက်တာ၊ Special Effect၊ သရုပ်ဆောင်၊ မင်းသား၊ မင်းသမီးဆိုရင်လည်း အကုန်လူငယ်တွေချည်းပဲ။ နာမည်လည်း မရှိကြပါဘူး။ အသစ်တွေချည်းပဲ ပေါင်းပြီးတော့ လုပ်ထားတာဖြစ်တယ်။ ကျွန်တော်တင်​မကဘဲ ကျွန်တော်တို့လူငယ်တွေ အများကြီး ပေါင်းပြီး ကြိုးစားထားပါတယ်။ ကျွန်တော်တို့ လူငယ်တွေအတွက်လည်း စိန်ခေါ်မှုတွေ တအားများတဲ့ ရုပ်ရှင်​ဇာတ်ကားကောင်း တစ်ကားပါ”လို့ ခါရာက ပြောပြခဲ့ပါ သေးတယ်။

ကိုယ့်ရဲ့ ဇာတ်ကားကို ယုံကြည်မှုရှိသော်လည်း တခြားဇာတ်ကားတွေနဲ့ ယှဉ်လာရင်​စိုးရိမ်မိတယ်​ဆိုတာကို ခါရာက ”ကိုယ်ပါဝင်​သရုပ်ဆောင်ထားတဲ့ ကိုယ့်ရဲ့ဇာတ်ကားကိုတော့ ယုံကြည်မှု ရှိတယ်။ ဒါပေမဲ့ မင်းသားဝိတ်တွေ ဘာတွေကြည့်လာပြီဆိုရင် နည်းနည်းစိုးရိမ်တာ တော့ရှိတယ်။ ဒီဇာတ်​ကားထဲမှာက အကုန်​လုံးနီးပါးက လူသစ်​တွေကြီးပဲ။ ကိုယ်ကလည်း ဒီကားမှာ အများကြီး ကြိုးစားထားတယ်။ ဇာတ်လမ်းကလည်း တကယ်တော့ Trailer ထက် ဆယ်ဆလောက် ကောင်းပါတယ်။ ငွေရေး၊ ကြေးရေး၊ လူအင်အား၊ အချိန်တွေရော အများကြီးပေးဆပ်ထားတဲ့ ဇာတ်ကား ကောင်းဆိုတော့ ပရိသတ်တွေကိုလာပြီးတော့ ကြည့်စေချင်တယ်”လို့လည်း ခါရာက ပြောပြခဲ့ ပါသေးတယ်။ ဆက်လက်ပြီး ခါရာက ”ကျွန်တော် မနေ့ကဖြစ်သည် ၂ ဇာတ်လမ်းတွဲ လွှင့်ပြီးသွားတဲ့ အချိန်မှာ ပရိသတ်တွေက ကျွန်တော့်ကို ဆရာရဲနောင်လို့ပဲ မြင်ကြတယ်။ ဆရာ ရဲနောင် ဆိုပြီးတော့ စိတ်ထဲမှာ စွဲသွားတယ်။ ဘယ်နေရာသွားသွား ဆရာရဲနောင်ဆိုပြီး ခေါ်ကြတယ်။ ကျွန်တော်ဆရာရဲနောင်​ဇာတ်ကောင်ကို ကြိုးစားခဲ့တာ ပရိသတ်ရင်ထဲရောက်တယ်ဆိုတော့ အဲဒီဇာတ်ကောင်အနေနဲ့ ကျွန်တော် အောင်မြင်တယ်လို့ ပြောလို့ရတယ်။ အခုနောက်ထပ်လည်း ဆိုင်းလုံဆိုတဲ့ ဇာတ်ကောင်ကို ပရိသတ်တွေရင်ထဲ စွဲစေချင်ပါသေးတယ်”လို့လည်း ပြောပြခဲ့ပါသေးတယ်။​

ခိုင်ဝါဝင်း၊ ဓာတ်ပုံ-အောင်ဇော်မင်း

Comments (0)

Leave a reply

Your email address will not be published. Required fields are marked *

*