သံမဏိသုံးဖော်

သံမဏိသုံးဖော်
August 7, 2018 AsianFame MediaGroup
သံမဏိသုံးဖော်

၈၈၈၈ အရေးအခင်းပြီးက တည်းက မတွေ့ဖြစ်တော့တဲ့ ဆရာ ကြီး လူထုဦးသစ်လွင်အိမ်ကို ရောက် ခဲ့ပါတယ်။ ဘဘက အရင်အတိုင်းပဲ ဖော်ရွေဆဲ၊ ကျန်းမာဆဲ၊ နူးညံ့သိမ် မွေ့ဆဲပါပဲ။ မျက်ရည်ကြည်တွေ ဝေ့ နေတဲ့ မျက်လုံးအစုံဟာ တောက်ပ တုန်းပါပဲ။ အဲဒီချိုမြတဲ့ မျက်လုံးတစ် စုံရဲ့ အနက်ရှိုင်းဆုံးမှာတော့ မာကျောကျစ်လျစ်တဲ့ နိုင်ငံရေးစိတ်၊ တိုင်းပြည်ချစ်တဲ့စိတ်၊ သတင်း၊ စာပေချစ်တဲ့စိတ်တွေက တလက် လက်တောက်ပနေဆဲပေါ့။

ပွေ့ဖက်နှုတ်ဆက်လိုက်တဲ့ လက်တစ်စုံကြားမှာ ကျွန်မမိဘ ရင်ခွင်ထဲ ပြန်ရောက်သွားသလို ရုတ် တရက် လုံခြုံသွားတယ်။ ဘဘဟာ အမြဲချစ်စရာကောင်းနေခဲ့ပါတယ်။ ဘဘနဲ့ ရှေးဟောင်းနှောင်းဖြစ်တွေ၊ လက်ရှိနိုင်ငံရေး၊ စာပေအကြောင်း တွေ အများကြီး ပြောဖြစ်ခဲ့တယ်။ ဆီးချိုရှိတဲ့ ဘဘအတွက် သီးသန့် ဖျော်ထားတဲ့ ဓာတ်ဘူးလေးထဲက လက်ဖက်ရည်ကို တစ်ငုံပြီးတစ်ငုံ ယူသောက်နေမိတယ်။ ဘဘက သူ သောက်မလို့ ကြည့်လိုက်တော့…

”ဟယ် မရှိတော့ဘူး။ ငါ့သမီး အကျင့်က မပျောက်ပါလားကွယ်။ ကလေးဆန်တုန်းပါလား”ဆိုတဲ့ သဘောကျ ညည်းညူတဲ့အသံလေးကို ကျွန်မ အတော်ချစ်သွားတယ်။ ပျော် လည်းပျော်တယ်။

ကျွန်မခပ်ငယ်ငယ်က သံမဏိ ဆရာကြီးတွေဖြစ်တဲ့ ဟံသာဝတီ ဦးဝင်းတင်၊ လူထုဦးလှ၊ လူထု ဦးသစ် လွင်၊ လူထုမောင်မဲတို့ရဲ့ ပေါင်ပေါ် တစ်လှည့်စီထိုင်ရင်း သူတို့ပြောနေ တဲ့ နိုင်ငံရေးနဲ့ စာပေတွေအကြောင်း နားလည်သလိုလိုနဲ့ စားပွဲပေါ်က မုန့် တွေ နှိုက်စားခဲ့တာကိုလည်း သတိ တရ ပြောဖြစ်ကြတယ်။ အမေလူထု ဒေါ်အမာက ဂျစ်ကားလေးနဲ့ ကျွန်မ တို့ကို ဓာတ်တော်ချိုင့်ရေတံခွန် လိုက်ပို့ပေးခဲ့တာလည်း အမှတ်တ ရပါပဲ။

လူထု မောင်မဲဆိုတာကတော့ ကျွန်မရဲ့အဘိုး၊ သခင်တင်ဟိန်း (လွတ်လပ်ရေးတိုက်ပွဲဝင်)၊ လူထု သတင်းစာမှာ ဆောင်းပါး၊ သတင်း ပင်တိုင်ရေးသူ၊ မောင်သစ်လွင် (လူထု)က လူထုသတင်းစာမှာ အယ် ဒီတာ၊ ဦးဝင်းတင်က ဟံသာဝတီ သတင်းစာက အယ်ဒီတာချုပ်၊ သတင်းသမား၊ နိုင်ငံရေးသမားတွေရဲ့ သံယောဇဉ်၊ ခင်မင်တွယ်တာမှုက နက်ရှိုင်းလွန်းလှပါတယ်။

၈၈၈၈ မှာ ကျွန်မအဖမ်းခံရ တော့မယ့်အတွက် ပြေးလွှားနေတဲ့အ ချိန်၊ ကျွန်မကို မန္တလေးမြို့ထဲမှာ ရအောင် လိုက်ရှာပြီး ကယ်ဆယ်ခဲ့ ကြတဲ့ လူထုဦးသစ်လွင်၊ ဦးကံချွန်၊ ဗိုလ်မော်၊ ချင်းတွင်းချစ်သွေး၊ ဒေါက် တာကိုကိုကြီး၊ ကားဆရာ ဦးသန်းတို့ ဟာ တကယ့်ကျေးဇူးရှင်တွေပါ။ စိတ် ဒဏ်ရာရနေတဲ့ ကျွန်မကို စိတ်ဓာတ် ခွန်အားတွေ ပေးခဲ့တဲ့ ပျံလွန်တော် မူသွားပြီဖြစ်တဲ့ ဆရာတော် ဦးပညာ၊ မောင်ပညာ (အမရပူရ)ကိုလည်း သတိရမိပါတယ်။

လူသေသွားပေမယ့် နာမည်မ သေတဲ့ ဆရာကြီးတွေပါပဲ။ တားဆီး ပိတ်ပင်မှုတွေ အမျိုးမျိုးကြားထဲက က လောင်ထိပ်မှာ သံမဏိစိတ် ဓာတ်တွေ စွပ်ပြီး တိုင်းပြည်အတွက်၊ လူငယ်တွေအတွက် ဗဟုသုတစာ ပေတွေ ရေးသားခဲ့ကြတယ်။ မတရား မှုကို တော်လှန်ခဲ့ကြတယ်။
စစ်အာဏာရှင်တို့ရဲ့ ပိတ်စေတဲ့ တစ်သွေး၊ တစ်သံ၊ တစ်မိန့်အောက် က ဟံသာဝတီ နောက်ဆုံးသတင်း စာမှာ ဦးဝင်းတင်က သိသိမှတ်မှတ်၊ အဘိုးမောင်မဲ ရေးသားတဲ့ဆောင်းပါး ကို ထည့်ပေးခဲ့တဲ့အကြောင်း ဦးဝင်း တင်က ဦးသစ်လွင်ဆီ စာရေးပြော ပြသခဲ့တယ်။ အဲဒီစာလေးတွေကို ဘဘက မျက်ရည်ဝဲဝဲနဲ့ ဖတ်ပြရင်း ကျွန်မကို ပေးလိုက်ပါတယ်။

သံမဏိသုံးဖော်ရဲ့ သတင်းသ မားသံယောဇဉ်၊ နိုင်ငံရေးသံယော ဇဉ်ကို ပြနေတဲ့ စာလေးတွေကို အမှတ်တရ တင်ပေးလိုက်ပါတယ်။ ဘဘဦးဝင်းတင်နဲ့ ဘဘ ဦးသစ်လွင် ရဲ့ မူရင်းလက်ရေးတွေပါ။ နိုင်ငံရေး သမား၊ တော်လှန်ရေးသမား၊ စာပေ သမားတွေ သေဆုံးသွားကြတယ်။ နိုင်ငံရေးဆိုတဲ့ ပင်လယ်ကြီးကတော့ ဘယ်လိုသတ်သတ် မသေတဲ့အရာလို ဆက်လက်ရှင်သန်နေတယ်။ နိုင်ငံ ရေးကမ်းခြေက လှပသလိုလိုနဲ့ အတွင်းမှာတော့ လှိုင်းလေတွေ ထန် နေလေရဲ့။ တိုင်းပြည်၊ ပြည်သူ၊ နိုင်ငံ ရေး၊ စာပေတွေဟာ ဘယ်တော့မှ ခွဲထုတ်လို့မရတဲ့ အရာတွေပါ။ သမိုင်းတွင်မယ့် နိုင်ငံကောင်း၊ အစိုး ရကောင်း၊ ခေါင်းဆောင်ကောင်း၊ မျိုး ဆက်ကောင်းတွေကျန်ရစ်ခဲ့ဖို့ လိုအပ် ပါတယ်။

အခု သံမဏိသုံးဖော်ကတော့ နိုင်ငံရေးပင်လယ်ထဲ ကန့်လန့်မျော နေတဲ့ တိုင်းပြည်ကို ရသလောက် ခွန်အားနဲ့ အရွေ့မှန်အောင် ကူညီ ခဲ့ကြသူတွေပါ။ တိုင်းပြည်ကောင်းစား ဖို့ မိသားစု၊ စည်းစိမ်၊ ဘဝ၊ အသက် ခန္ဓာတွေ စွန့်သွားကြတဲ့ သမိုင်းအစဉ် အဆက်က သူရဲကောင်းများ အားလုံး ကို တလေးတစား ဦးညွှတ်လိုက်ပါ တယ်။

နန်းခင်သန္တာဦး (တောင်ကြီး)

Comments (0)

Leave a reply

Your email address will not be published. Required fields are marked *

*