သဒ္ဓါ၊ သီလ၊ စာဂ၊ ပညာ၊ မင်္ဂလာ နှစ်သစ် ဖြစ်ပါစေ …

သဒ္ဓါ၊ သီလ၊ စာဂ၊ ပညာ၊ မင်္ဂလာ နှစ်သစ် ဖြစ်ပါစေ …
January 8, 2018 Asian Fame
သဒ္ဓါ၊ သီလ၊ စာဂ၊ ပညာ၊ မင်္ဂလာ နှစ်သစ် ဖြစ်ပါစေ …

ပျက်စီးယိုယွင်းလာတဲ့ ကမ္ဘာကြီးမှာ လူသားတွေလည်း စာနာ နားလည်မှုတွေ ကင်းမဲ့ကာ ဖောက်ပြန်ပျက်စီးလာကြပါပြီ။ လူသားတွေဟာ လူသား အချင်းချင်းအပေါ်မှာ မေတ္တာတရားမထားနိုင်ကြဘဲ လောဘ၊ ဒေါသ၊ မောဟတွေ များပြားလာပြီး ဒီလူသားကမ္ဘာကြီးထဲမှာ ငြိမ်းချမ်းမှုတွေ လျော့နည်းပါးလာပါ တယ်။ ဒီလို ရာစုသစ်ခေတ်ကာလကြီးမျိုးမှာ ရှေးဘိုးဘွားလက်ထက်ကပင် မေတ္တာတရားကြီးမားခဲ့ကြတဲ့ မြန်မာနိုင်ငံသူ၊ နိုင်ငံသားတွေကတော့ ဗုဒ္ဓဘုရားရဲ့ တရားဓမ္မများကို ပွားများကျင့်ကြံနာယူမှတ်သားကာ မေတ္တာလွှမ်းခြုံလို့နေတဲ့ လူ့ဘောင်အဖွဲ့ အစည်းပြယုဂ်တည်လှစ်ပြနေပြီမို့ ဂုဏ်ယူစရာပါ။ ဒါကတော့ မြန်မာ ပြည်သူပြည်သားများလည်း ပြာသိုလပြည့်နေ့က ရွှေတိဂုံစေတီတော်ကြီးမှာ သံဃာအပါး ၁၈,ဝဝဝ တို့ဖြင့် ဗုဒ္ဓါဘိသေက အနေကဇာတင်မဟာမင်္ဂလာနှင့် ဆွမ်းဆန် စိမ်းလောင်းလှူခြင်းမင်္ဂလာ အခမ်းအနားကို ကြီးကျယ်ခမ်းနားစွာကျင်းပနိုင်ခဲ့ခြင်းဖြစ်ပါတယ်။

ဇန်နဝါရီ ၁ ရက်နေ့ ရွှေတိဂုံစေတီတော်ပေါ်မှာ ပြည်ထောင်စုအစိုးရက ဦးစီးကျင်းပတဲ့ ဗုဒ္ဓါဘိသေကအနေကဇာတင်မဟာ မင်္ဂလာအခမ်းအနားမှာ ရေစက်ချသြဝါဒမိန့်ကြားရာတွင် ”သာသနာခရီး တစ်လျှာက်လုံးမှာ ဗောဓိပင် ခြေရွှေပလ္လင်တော်ပေါ်မှာ မြတ်စွာဘုရား အောင် မြင်တော်မူပြီးတဲ့ အောင်ပွဲ ပြီးတဲ့နောက်မှာ ဤမျှကြီးကျယ်တဲ့ သံဃအစည်းအဝေးပွဲကြီးတွေမရှိခဲ့ဖူးဘူး။ ဒီပွဲဟာ ဒုတိယအကြီးဆုံးပွဲပဲ”လို့ သီတဂူဆရာတော်ဒေါက်တာအရှင်ဥာဏိဿရ က မိန့်ကြားခဲ့ပါတယ်။

ဇန်နဝါရီ ၁ ရက်နေ့မှ ၃ ရက်နေ့အထိ သံဃာတော်အပါး ၁၈,ဝဝဝ ပါဝင်ခဲ့တဲ့ ရွှေတိဂုံစေတီတော် ဗုဒ္ဓါဘိသေကအနေကဇာတင် မဟာမင်္ဂလာ အခမ်းအနားနဲ့ ဆွမ်းဆန်စိမ်းလောင်းလှူပွဲမှာ ရန်ကုန်တိုင်းဒေသကြီးဝန်ကြီး ချုပ်ဦးဖြိုးမင်းသိန်းက အခမ်းအနားအောင်မြင်စွာကျင်းပနိုင်သည့် အထိမ်း အမှတ်အဖြစ် ရွှေတိဂုံစေတီတော် တောင်ဘက်မုခ်မှာ ကမ္ပည်းကျောက်စာတိုက် စိုက်ထူရန်စီစဉ်နေကြောင်း ပြောပါတယ်။ ရန်ကုန်တိုင်းဒေသကြီးအစိုးရအဖွဲ့မှ ဦးစီးကျင်းပတဲ့ ၂ဝ၁၈ နှစ်သစ်ကူးတရားကို ဇန်နဝါရီလ ၁ရက်မှ ၃ ရက်အထိ ပြည်သူ့ရင်ပြင်မှာ ၃ ရက်တိုင်ကျင်းပပြုလုပ်ခဲ့ပါ တယ်။ နှစ်သစ်ကူးတရားပွဲမှာ ပါမောက္ခချုပ်ဆရာတော် ဒေါက်တာအရှင်နန္ဒမာလာဘိဝံသ၊ သီတဂူဆရာတော် အရှင်ဒေါက်တာÓဏိဿရ၊ ရွှေပါရမီတောရ ဆရာတော်အရှင်ဆန္ဒာဓိကတို့က ဟောကြားခဲ့ပါတယ်။

ပါမောက္ခချုပ်ဆရာတော်ဘုရားကြီး ဒေါက်တာနန္ဒမာလာဘိဝံသက နှစ်သစ်ကူးအထူးဓမ္မသဘင်မှာ ”မင်္ဂလာတရားတော်နှင့်အညီ နိုင်ငံသစ်တည်” ခေါင်းစဉ်ဖြင့် တရားဓမ္မများဟောတော်မူခဲ့ပါတယ်။ တရားပွဲများမှာ တရားနာ ယူသူပရိသတ်ပေါင်းများစွာ လာရောက်တရားနာယူကြသလို တရားနာယူသူ များ ကျန်းမာရေး၊ နေရာထိုင်ခင်းများ၊ လုံခြုံရေးများကို ကုသိုလ်ယူ ဆောင် ရွက်ပေးနေကြသူများကိုလည်းတွေ့ရပါတယ်။ မြန်မာပြည်သူပြည်သား အားလုံးအတွက် ပါမောက္ခချုပ်ဆရာတော်ဘုရားကြီးရဲ့ နှစ်သစ်စကား လက်ဆောင်က …

”လောကလူသားတွေဟာ နှစ်ဟောင်းကုန်လို့ နှစ်သစ်ရောက်ပြီဆို ရင်နှစ်သစ်မှာ ဘာဖြစ်ပါစေ၊ညာဖြစ်ပါစေဆိုပြီး တောင်းဆုပြုကြတာ ထုံးစံ တစ်ခုပါပဲ။ Happy New Year လို့အော်ပြီး သောက်စားပျော်ပါး ဆုတောင်း ကြရုံနဲ့တော့ နှစ်သစ်မှာလိုအင်ဆန္ဒတွေဟာ ပြည့်ဝလာနိုင်မှာမဟုတ်ပါဘူး။ လူတွေဟာ ရောက်ရှိလာမယ့်နှစ်သစ်မှာ မိမိတို့ရဲ့စီးပွားရေး၊ လူမှုရေး၊ ပညာ ရေး၊ ဘဝနေထိုင်ရေးစတဲ့ အရာရာအားလုံးကိုအဆင်ပြေဖို့ မျှော်လင့်ချက်ကြီးစွာ ထားတတ်ကြပါတယ်။ လူသားတိုင်းမျှော်လင့်တကြီးနဲ့ လိုချင်ကြတဲ့အရာလေးခု ရှိပါတယ်။

၁ ။ လူတိုင်းဟာ မိမိရဲ့စီးပွားရေးကို တိုးတက်လိုကြပါတယ်။ချမ်းသာကြွယ်ဝ လိုကြပါတယ်။ အရင်နှစ်ကထက် ငွေတွေပိုရ၊ အလုပ်တွေ ပိုကောင်းဖို့မျှော်လင့် ကြပါတယ်။

၂။ ဒီလိုငွေတွေရလို့ စည်းစိမ်တွေတိုးလာပြီ ဆိုရင်လည်းအရင်နှစ်တွေကထက် ပိုပြီးကျော်ကြားလိုကြပါသေးတယ်။ ဂုဏ်သရေရှိ နာမည်ကျော်တဲ့ ပုဂ္ဂိုလ်ကြီး တစ်ယောက်ဖြစ်ဖို့ မျှော်လင့်ကြပါတယ်။

၃။ ဒီလို ငွေချမ်းသာ၊နာမည်ကျော်နေရုံနဲ့ လူတွေရဲ့လိုအင်က ပြည့်ပြီလား ဆိုတော့ မပြည့်နိုင်သေးပါဘူး။ လာမယ့်နှစ်မှာ ကျန်းကျန်းမာမာနဲ့ အသက် ရှည်ချင်ကြပါသေးတယ်။

၎။ ငွေကြေးနဲ့ အောင်မြင်မှုတွေကို ကျန်းကျန်းမာမာနဲ့ ရရှိပြီးလို့ရော လူတွေရဲ့မျှော်လင့်ချက်က ပြီးဆုံးသွားသလားဆိုတော့ မပြီးဆုံးသေးပါဘူး။သေလွန်ပြီး နောက်တစ်ဘဝမှာ ကောင်းတဲ့နေရာကို ရောက်ချင်ကြပါသေးတယ်။ဘယ်ဘာသာဝင်တွေပဲဖြစ်ဖြစ် နောက်ဆုံးမျှော်လင့်ချက်အနေနဲ့ အမျှော်လင့် ကြီး မျှော်လင့်ကြပါသေးတယ်။ ဒီလိုလူသားတွေရဲ့ မျှော်လင့်မှုတွေက တကယ်ဖြစ်လာကြသလားဆိုတော့ မျှော်လင့်သလိုဖြစ်မလာကြတာတွေက လည်း အများကြီးပါပဲ။ မျှော်လင့်ရင်း နှစ်ပေါင်းများစွာရှင်သန်နေကြတဲ့ လူသားတွေဟာ နှစ်တစ်ခုကုန်တိုင်းကုန်တိုင်း ပိုအဆင်ပြေကြဖို့ ပိုချမ်းသာကြဖို့ မျှော်လင့်ရင်းနဲ့ နှစ်သစ်ကို ကြိုဆိုတတ်ကြပါတယ်။ မျှော်လင့်ချက်တွေအတိုင်း ဖြစ်လာဖို့၊ မျှော်လင့်ခဲ့ပြီးတဲ့အတိုင်းရရှိထားတဲ့ ချမ်းသာသုခတွေ ခိုင်မြဲဖို့ဆိုရင် လူတွေရဲ့သန္တာန်မှာ သဒ္ဓါ၊သီလ၊စာဂ၊ပညာ ဆိုတဲ့ အကြောင်းတရားတွေနဲ့လည်း ပြည့်စုံဖို့လိုပါတယ်။

သဒ္ဓါ – သဒ္ဓါဆိုတာက ကုသိုလ်တရားနဲ့ ပတ်သက်ပြီး စိတ်ဝင်စားတာယုံကြည်တာကိုခေါ်ပါတယ်။ သဒ္ဓါရှိသူဟာ စိတ်ကြည်နူးပါတယ်။စိတ်ကြည် တာကြောင့် ကောင်းတဲ့အလုပ်တွေမှာ၊ကုသိုလ်ရေးတွေမှာ စိတ်ပါဝင်စား လာပါတယ်။ကောင်းတာတွေလုပ်လို့ကောင်းကျိုးတွေ ရလာပါလိမ့်မယ်။

သီလ – သီလဆိုတာ ကိုယ်ကျင့်တရားပါ။ ကိုယ်ကျင့်တရားကောင်းတဲ့သူဟာ မိမိကိုယ်ကို ထိန်းကျောင်းတတ်လာသလို ပတ်ဝန်းကျင်မှာလည်း ဂုဏ်သတင်း ကြီးလာပါလိမ့်မယ်။

သီလဆိုတာ သဒ္ဓါကိုအခြေခံပြီး ဖြစ်ထွန်းလာရ တာပါ။မြတ်စွာဘုရား ရဲ့Óဏ်တော်ကြီး ကို ယုံကြည်တယ်။ကောင်းတာလုပ်ရင် ကောင်းတာဖြစ်မယ်။မကောင်းတာလုပ်ရင် မကောင်းတာဖြစ်တယ်ဆိုတဲ့ ကံကံ၏အကျိုးကိုယုံကြည် တယ်ဆိုတဲ့ သဒ္ဓါ ရှိသူဟာ ကောင်းတာတွေပဲ လုပ်မှာဖြစ်လို့ သူရဲ့သန္တာန်မှာ သီလ ဆိုတာဟာလည်း ပြည့်စုံလာပါလိမ့်မယ်။

စာဂ– လူတွေဟာ မိမိတို့ရရှိထားတဲ့ ပစ္စည်းဥစ္စာတွေပေါ်မှာ တွယ်မက် မနေဘဲ အများနဲ့ မျှဝေ သုံးစွဲတတ်ရပါမယ်။ ကိုယ်တစ်ယောက်တည်း သုံးစွဲနေ တယ် ဆိုရင် လူ့အသိုင်းအဝိုင်းကို အကျိုးမပြုသူလို့ ခေါ်ရပါလိမ့်မယ်။ လူ့ အသိုင်းအဝိုင်းအပေါ် အကျိုးမပြုသူကို အသိုင်းအဝိုင်းကလည်း ပြန်ပြီး အကျိုးပြုမှာမဟုတ်ပါဘူး။ အသိုင်းအဝိုင်းထဲမှာ စိတ်ချမ်းမြေ့ပြီး ပျော်စရာ ကောင်းတဲ့ လူဖြစ်မလာနိုင်ပါဘူး။ မိမိရရှိထားတဲ့ စည်းစိမ်ဥစ္စာတွေအပေါ် တွယ်ကပ်မနေဘဲ စွန့်လွှတ်တတ်ရပါမယ်။ လှူဒါန်းတတ်ရပါမယ်။ ပေးသော လက်ဟာ ယူသော လက်ထက်သာ၍ မြတ်သည်ဆိုတဲ့အတိုင်း စွန့်လွှတ်ခြင်း၊ လှူဒါန်းခြင်းရဲ့ သဘောသဘာဝကို သိနားလည်ဖို့လိုပါသေးတယ်။စွန့်လွှတ် တတ်သူ တစ်ယောက်ဟာ မိမိဆီကပေးလိုက်ရတဲ့အတွက် ပေါ့ပါးသွား ပါလိမ့်မယ်။ ပေါ့တဲ့အရာက အထက်တက်တယ်ဆိုတဲ့ နိယာမသဘောကို သိထားရင် စွန့်လွှတ်တတ်လာပါလိမ့်မယ်။

ပညာ – အသိပညာကလည်း အရေးကြီးပါတယ်။ အရာရာမှာ ဘာလုပ် သင့်တယ်၊ ဘာကိုဖြင့် မလုပ်သင့်ဘူးလို့ ခွဲခြားသိရပါလိမ့်မယ်။ လူတစ်ယောက် ဒုက္ခရောက်ပြီဆိုရင် တခြားသူတွေက ”ဖြစ်မှာပေါ့၊မလုပ်သင့်တာတွေ လျှောက် လုပ်တာကိုး” လို့ အပြစ်ဆိုတတ်ကြပါတယ်။ ဒါပေမဲ့ ”ဒီလူက လုပ်သင့် တာကိုမှ မလုပ်ဘဲ” ဆိုတဲ့ အပြောမျိုးကတော့ မရှိသလောက်ပါပဲ။ တကယ် တော့ မလုပ်သင့်တာကို လုပ်မိတာက အပြစ်ဖြစ်သလို လုပ်သင့်တာကို မလုပ် ခဲ့တာကလည်း အပြစ်ပါပဲ။ ဒီထက်ပိုအဆင့်မြင့်လာတဲ့ အခါမှာတော့ သံသရာထဲ ဘာလို့လည်နေရသလဲ၊ ဘဝမှာ ဘာအရေးကြီးဆုံးလဲ၊ ဆိုပြီး သိ အောင်ကြိုးစားလာကြပါတယ်။ အဆင့်မြင့်ဆုံးပညာကတော့ ဝိပဿနာ ပညာ ပါဘဲ။ ဝိပဿနာပညာ ရင့်ကျက်လာသူကတော့ တွယ်တာမှုတွေကို လျှော့ချ လာနိုင်ပါတယ်။ တွယ်တာမှုကြောင့် စိုးရိမ်သောကဖြစ်ရပါတယ်။ တွယ်တာ တယ်ဆိုတာကလည်း ကိုယ်ချစ်ခင်တဲ့ သူတွေအပေါ်မှာပဲ တွယ်တာမိတတ်ကြ တာပါ။ ချစ်စရာများလေ တွယ်တာစရာများလေ၊ တွယ်တာစရာများလေ စိုးရိမ်သောက များလေပါပဲ။ အချစ်တွေမလျှော့နိုင်သေးရင် သောကတွေလည်း မလျှော့သွားနိုင်သေးပါဘူး။ ဒီလိုခွဲခြားသိမြင်တတ်တဲ့ ပညာမျိုးကို ပြုစုပျိုး ထောင်ပေးဖို့လိုပါလိမ့်မယ်။

နှစ်ဟောင်းကထက် နှစ်သစ်မှာ ပိုပြီးအဆင်ပြေ ချင်တယ်၊ ချမ်းသာချင် တယ်ဆိုရင် ကျန်ခဲ့တဲ့ နှစ်ဟောင်းထက် အခုနှစ်သစ်မှာ
-ပိုပြီး သဒ္ဓါတရားတွေ ကောင်းလာဖို့ —-
-ပိုပြီး ကိုယ်ကျင့်တရားတွေ ကောင်းလာဖို့ —-
-ပိုပြီး စွန့်လွှတ်မှုတွေ ခိုင်မာလာဖို့ —-
-ပိုပြီး အသိပညာတွေ ကြွယ်ဝလာဖို့ —- လိုပါတယ်။

လောကလူသားတွေဟာ အသစ်တွေကိုပဲ အမြဲမျှော်လင့်နေတတ် ကြတာ ပါ။ နှစ်ဟောင်းနဲ့အတူ ပျိုရွယ်မှုတွေ၊ အားအင်တွေ ကျန်ခဲ့ပါပြီ။သတ်မှတ် ထားတဲ့နှစ်တစ်နှစ်ရဲ့ နောက်ဆုံးနေ့ကို ရောက်လာခဲ့သလို မိမိရဲ့နောက်ဆုံးနေ့ဆို တာလည်း ရောက်လာပါလိမ့်ဦးမယ်။ အသစ်ကို မျှော်တာဟာ တဏှာရဲ့ သွေး ဆောင်မှု၊ တဏှာ မကင်းကြသေးတဲ့သူတွေရဲ့ အတွေးတစ်ခုသက်သက်သာ ဖြစ်ပါတယ်။အသစ်တွေ ထပ်လိုချင်နေသရွေ့ သံသရာမှာ ဒုက္ခတွေနဲ့ ဆုံကြ ကြုံကြ ရဦးမှာပါ။ နှစ်သစ်ကို တဏှာရဲ့ မျှော်လင့်ချက်မျိုးတွေနဲ့ ကြိုဆိုတာမျိုး မဖြစ်စေဘဲ အရင်ကမဖြစ်ဖူးသေးတဲ့ သဒ္ဓါ၊ သီလ၊ စာဂ၊ ပညာ စတဲ့ တရား အသစ်တွေဖြစ်ပေါ်စေမယ့် ကြိုဆိုမှုမျိုးနဲ့ ဖြတ်သန်းကြဖို့လိုပါတယ်။

ဒီ့ထက်ပိုပြီးတော့မှလည်း တစ်ဆင့်တက်ရင်း ဘဝအသစ် ထပ်မဖြစ်မယ့် လမ်းကိုကြိုးစားလျှောက်လှမ်းဖို့လိုအပ်ပါတယ်”လို့ ဟောကြားဆုံးမထားပါတယ်။ ဒါကြောင့် ကမ္ဘာသူ၊ ကမ္ဘာသားအပေါင်း၊ မြန်မာပြည်သူ ပြည်သားအပေါင်း ၂ဝ၁၈ခုနှစ် မင်္ဂလာနှစ်သစ်မှာ သဒ္ဓါ၊ သီလ၊ စာဂ၊ ပညာ စတဲ့ တရားအသစ် တွေဖြစ်ပေါ်ပါစေကြောင်း၊ လိုတိုင်းတရ၊ ကြံသမျှ အောင်မြင်ကာ ကျန်းမာလန်းဖြာချမ်းသာကြပါစေကြောင်း မင်္ဂလာဆုမွန်ကောင်းတောင်း လိုက်ရပါတယ်။

အယ်ဒီတာတစ်ဦး၊ ဓာတ်ပုံ-ဦးသန်းဇော်၊ အောင်နိုင်စိုး(ကစ္ဆပ)၊ K.Moe

Comments (0)

Leave a reply

Your email address will not be published. Required fields are marked *

*